तुळजापूर : ‘आम्ही पोलिस आहोत, शहरात सध्या चोऱ्या होत आहेत, त्यामुळे तुमचे दागिने पर्समध्ये ठेवा’ अशी बतावणी करून दोन भामट्यांनी एका ७२ वर्षीय वृद्धेचे तब्बल ६० हजार रुपये किमतीचे दोन तोळ्यांचे सोन्याचे ‘मिनी गंठण’ हातोहात लांबवल्याची धक्कादायक घटना तुळजापूर येथे घडली. रविवारी (ता. १२) दुपारी सव्वातीनच्या सुमारास सैनिक स्कूलजवळ हा प्रकार घडला.
याप्रकरणी उन्नती भामंडळ मेहता (वय ७२, रा. मंगरुळ, ता. तुळजापूर, जि. धाराशिव) यांनी सोमवारी (ता. १३) तुळजापूर पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी उन्नती मेहता आणि त्यांचे पती हे रविवारी (ता. १२) दुपारी ३.१५ वाजण्याच्या सुमारास तुळजापूरवरून त्यांच्या गावी, मंगरुळकडे पायी जात होते. ते सैनिक स्कूलच्या पुढे रस्त्यावर आले असता, दोन अनोळखी इसमांनी त्यांना अडवले. आपण पोलिस असल्याचे भासवत त्यांनी या वृद्ध दाम्पत्याला विश्वासात घेतले. “तुळजापूर शहरात सध्या चोऱ्यांचे प्रमाण वाढले आहे, त्यामुळे तुम्ही गळ्यातील दागिने काढून सुरक्षितपणे पर्समध्ये ठेवा,” असा सल्ला या तोतया पोलिसांनी दिला.
सुरक्षेच्या कारणास्तव उन्नती मेहता यांनी त्यांच्या गळ्यातील दोन तोळ्यांचे सोन्याचे मिनी गंठण (अंदाजे किंमत ६० हजार रुपये) काढले. मात्र, ते पर्समध्ये ठेवण्याचा बहाना करून भामट्यांनी हातचलाखीने ते स्वतःजवळच ठेवले आणि तेथून पोबारा केला. आपली फसवणूक झाल्याचे लक्षात आल्यानंतर या दाम्पत्याने पोलिसांत धाव घेतली.
उन्नती मेहता यांनी दिलेल्या प्रथम खबरीवरून तुळजापूर पोलिस ठाण्यात दोन अनोळखी इसमांविरुद्ध भारतीय न्याय संहिता (भा.न्या.सं.) कलम ३१८(४) आणि ३(५) अन्वये गुन्हा दाखल करण्यात आला आहे. या भामट्यांचा शोध आता तुळजापूर पोलिस घेत आहेत. नागरिकांनी अशा तोतया पोलिसांपासून सावध राहावे, असे आवाहनही करण्यात आले आहे.
