उमरगा: ‘तू मला काल शिवीगाळ का केलीस,’ अशी कुरापत काढून एकाला दुधाचा कॅन फेकून मारत जखमी केल्याची, तसेच थेट घरी जाऊन काठीने व लाथाबुक्क्यांनी बेदम मारहाण केल्याची घटना कदेर (ता. उमरगा) येथे घडली. याप्रकरणी उमरगा पोलिस ठाण्यात दोघांवर गुन्हा दाखल करण्यात आला आहे.
याबाबत पोलिसांनी दिलेली अधिक माहिती अशी की, कदेर (ता. उमरगा) येथील फिर्यादी अमोल क्रांतीवीर कल्लशेट्टी (वय ४०) हे मंगळवारी (ता. १४ एप्रिल) सकाळी सात वाजेच्या सुमारास गावातील मारुती मंदिराजवळ असलेल्या बागड माने गोपाळ यांच्या दूध डेअरीजवळ होते. यावेळी गावातीलच आरोपी विनोद राजेंद्र कलशेट्टी तेथे आला. त्याने ‘तू मला काल शिवीगाळ का केलीस?’ अशी विचारणा करत अमोल यांच्यावर दुधाचा कॅन फेकून मारला. यात अमोल हे जखमी झाले.
या घटनेनंतर आरोपी विनोद कलशेट्टी आणि सुनंदा कलशेट्टी (दोघे रा. कदेर, जि. धाराशिव) यांनी मिळून अमोल कल्लशेट्टी यांच्या घरी गाठले. तिथे जाऊन या दोघांनी अमोल यांना काठीने आणि लाथाबुक्क्यांनी बेदम मारहाण केली, तसेच जीवे मारण्याची धमकी दिली.
याप्रकरणी अमोल कल्लशेट्टी यांनी मंगळवारी (ता. १४) दिलेल्या फिर्यादीवरून उमरगा पोलिस ठाण्यात आरोपी विनोद कलशेट्टी आणि सुनंदा कलशेट्टी यांच्याविरुद्ध भारतीय न्याय संहिता (भा.न्या.सं.) कलम ११८(१), ११५(२), ३५२, ३५१(२), ३५१(३) व ३(५) अन्वये गुन्हा नोंदविण्यात आला आहे. या प्रकरणाचा पुढील तपास उमरगा पोलिस करत आहेत.
