धाराशिव : जिल्ह्यात भुरट्या चोऱ्या आणि घरफोडीच्या घटनांमध्ये वाढ झाली असून, परंडा, कळंब, उमरगा आणि शिराढोण पोलिस ठाण्यांच्या हद्दीत चोरीच्या चार वेगवेगळ्या घटना समोर आल्या आहेत. यात बंद घरासह, हॉटेल, दुचाकी आणि सोलार कंपनीच्या साहित्यावर चोरट्यांनी डल्ला मारला असून, तब्बल २ लाख १६ हजार रुपयांचा मुद्देमाल लंपास केला आहे. याप्रकरणी सोमवारी (ता. १३) संबंधित पोलिस ठाण्यांत गुन्हे दाखल करण्यात आले आहेत.
परंड्यात बंद घर फोडून ७३ हजारांची चोरी
परंडा तालुक्यातील आरणगाव येथे एका बंद घराचे कुलूप तोडून अज्ञात चोरट्यांनी ११ ग्रॅम सोन्याचे दागिने, चांदीचे दागिने आणि २५ हजार रुपयांची रोख रक्कम असा एकूण ७३ हजार रुपयांचा ऐवज चोरून नेला. फिर्यादी विनोद चंद्रकांत पिंगळे (वय ३४) हे ८ एप्रिल ते १३ एप्रिल या कालावधीत घराबाहेर असताना ही घरफोडी झाली. सोमवारी सकाळी हा प्रकार उघडकीस आल्यानंतर त्यांच्या फिर्यादीवरून परंडा पोलिस ठाण्यात भारतीय न्याय संहिता (भा.न्या.सं.) कलम ३३१(४), ३०५(अ) अन्वये गुन्हा नोंदवण्यात आला आहे.
कळंबमध्ये हॉटेलमधून साहित्यासह रोख रक्कम लंपास
कळंब तालुक्यातील पिंपळगाव डोळा शिवारात गट क्रमांक ५० मधील ‘दत्तगुरु’ नावाचे हॉटेल व रसवंती गृह चोरट्यांनी फोडले. रविवारी (ता. १२) रात्री ते सोमवारी (ता. १३) पहाटेच्या दरम्यान पाठीमागील पत्र्याच्या शेडचा दरवाजा तोडून चोरट्यांनी आत प्रवेश केला. दुकानातून गव्हाचे चार कट्टे, एक मोबाईल, सात हजारांची रोकड तसेच प्लास्टिकच्या बरण्या, वेपर्स आणि भडंगची पाकिटे असा एकूण १९ हजार रुपयांचा माल चोरून नेला. याप्रकरणी कृष्णा व्यंकट इंगोले (वय ३०) यांच्या प्रथम खबरीवरून कळंब पोलिस ठाण्यात भा.न्या.सं. कलम ३३४(१), ३०५ अन्वये गुन्हा दाखल झाला आहे.
उमरग्यातून ७८ हजारांची दुचाकी चोरीला
उमरगा शहरातील गणेश नगर भागातून एका तरुणाची दुचाकी मध्यरात्रीच्या सुमारास चोरीला गेली. अमित लक्ष्मण पाचंगे (वय ३०) यांनी त्यांची ७८ हजार रुपये किमतीची काळ्या रंगाची बजाज कंपनीची मोटरसायकल (एमएच २५ बीएफ ११२३) उभी केली होती. १० एप्रिलच्या रात्री ते ११ एप्रिलच्या पहाटे साडेपाचच्या दरम्यान अज्ञात चोरट्याने ती पळवली. याप्रकरणी अमित पाचंगे यांनी दिलेल्या फिर्यादीवरून उमरगा पोलिस ठाण्यात भा.न्या.सं. कलम ३०३(२) नुसार गुन्हा नोंद करण्यात आला आहे.
गौरगाव (शिराढोण) येथे सोलार प्रकल्पाचे ४६ हजारांचे साहित्य चोरीला
कळंब तालुक्यातील गौरगाव येथील ‘निमेश एनर्जी सोल्युशन प्रा. लि.’ या कंपनीच्या सोलार प्लॉटवरून लाखो रुपयांचे तांब्याचे केबल व इतर तांत्रिक साहित्य चोरीला गेले. २४ ते २५ मार्चच्या मध्यरात्री चोरट्यांनी ८०० मीटर कॉपर केबल, विविध प्रकारचे शेकडो कनेक्टर, ५ पियु फोम कॅन, १०० मीटर पाईप आणि ४०० केबल टाई असा एकूण ४६ हजार रुपयांचा माल लंपास केला. कंपनीचे तंत्रज्ञ जीवन गोपीनाथ चौधरी (वय २७) यांनी दिलेल्या फिर्यादीवरून सोमवारी (ता. १३) शिराढोण पोलिस ठाण्यात अज्ञात व्यक्तीविरुद्ध भा.न्या.सं. कलम ३०३(२) अन्वये गुन्हा दाखल करण्यात आला आहे. सर्व प्रकरणांचा पुढील तपास स्थानिक पोलिस करत आहेत.
