महावितरणच्या कारभाराविरोधात ठाकरे गटाचा संताप; धाराशिवमध्ये तीव्र ‘रास्ता रोको’

धाराशिव : शहरी आणि ग्रामीण भागात सुरु असलेले अघोषित लोडशेडिंग त्वरित बंद करून शेतीसाठी सलग ८ तास सुरळीत वीजपुरवठा करावा, या मागणीसाठी शिवसेना (उद्धव बाळासाहेब ठाकरे) पक्षाच्या वतीने सोमवारी (ता. २०) सकाळी ঠিক ११ वाजता धाराशिव येथील ताजमहल परिसरातील महावितरण (MSEB) कार्यालयासमोर तीव्र रास्ता रोको आंदोलन करण्यात आले. यावेळी संतप्त पदाधिकारी आणि शेतकऱ्यांनी प्रशासनाच्या गलथान कारभाराविरोधात जोरदार घोषणाबाजी करत अधिकाऱ्यांना निवेदन दिले.

पिके वाळली, ट्रान्सफॉर्मर जळाले

धाराशिव जिल्ह्यात मागील वर्षी समाधानकारक पाऊस झाल्याने शेतकऱ्यांनी मोठ्या आशेने उन्हाळी पिकांची लागवड केली आहे. मात्र, ऐन उन्हाळ्यात विजेअभावी ही पिके डोळ्यादेखत करपू लागली आहेत. महावितरणकडून सध्या अत्यंत कमी दाबाने वीजपुरवठा होत असल्यामुळे शेतकऱ्यांच्या कृषी पंपाच्या मोटारी नादुरुस्त होणे आणि वारंवार ट्रान्सफॉर्मर जळणे अशा घटना वाढल्या आहेत. यामुळे शेतीचे मोठे आर्थिक नुकसान तर होत आहेच, शिवाय जनावरांच्या पिण्याच्या पाण्याचा प्रश्नही गंभीर बनला असून शेतकरी मानसिक तणावाखाली आहेत.

सकाळ-संध्याकाळच्या अंधारामुळे नागरिकांचे हाल

सकाळी ६ ते ८ या अत्यंत महत्त्वाच्या वेळेतच वीज गायब केली जात आहे. नेमक्या याच वेळी दूध उत्पादक शेतकरी गोठ्यातील कामे करत असतात, विद्यार्थ्यांची शाळेची लगबग असते आणि गृहिणींची स्वयंपाकाची वेळ असते. वीज खंडित केल्याने या सर्वांची मोठी गैरसोय होत आहे. तसेच, अनेक गावांमध्ये संध्याकाळी ६ ते रात्री १० या वेळेत सिंगल फेज वीजपुरवठा बंद ठेवला जातो. जे शेतकरी शेतातच वास्तव्यास आहेत, त्यांना आणि त्यांच्या कुटुंबाला या अंधाराचा मोठा त्रास सहन करावा लागत आहे.

विद्यार्थ्यांचे शैक्षणिक नुकसान

सध्या सर्वत्र परीक्षांचे दिवस सुरू आहेत. मात्र, रात्रीच्या वेळी सातत्याने वीजपुरवठा खंडित होत असल्याने विद्यार्थ्यांना अभ्यासापासून वंचित राहावे लागत आहे. यामुळे विद्यार्थ्यांचे नाहक शैक्षणिक नुकसान होत असून पालकांमध्ये संतापाचे वातावरण आहे.

या आहेत प्रमुख मागण्या:

• शेतकऱ्यांना कृषी पंपासाठी पुरेशा दाबाने किमान ८ तास सुरळीत वीजपुरवठा करावा.

• रात्रीचे लोडशेडिंग तात्काळ थांबवावे.

• नादुरुस्त झालेले आणि जळालेले ट्रान्सफॉर्मर शेतकऱ्यांना तात्काळ उपलब्ध करून द्यावेत.

या रास्ता रोको आंदोलनात ठाकरे गटाचे पदाधिकारी आणि शेतकरी मोठ्या संख्येने सहभागी झाले होते. यामध्ये प्रामुख्याने तालुका प्रमुख सतीशकुमार सोमाणी, युवा सेना जिल्हाप्रमुख रवी वाघमारे, जिल्हा प्रवक्ते जगदीश पाटील, जि.प. सदस्य प्रदीप घेणे, विठ्ठल सातपुते, पं.स. सदस्य राजदीप गायकवाड, आदित्य पवार, विधानसभा संघटक शौकत शेख, शहर प्रमुख सोमनाथ गुरव, नगरसेवक ज्ञानदेव करवर, पंकज पाटील, अमित उंबरे, मा. नगरसेवक राणा बनसोडे, संभाजी सलगर, सिद्धेश्वर कोळी, युवासेना तालुकाप्रमुख राकेश सूर्यवंशी, युवासेना शहर प्रमुख अभिजीत कदम, वाहतूक सेनेचे जिल्हाध्यक्ष सुनील वाघ यांच्यासह लखन देशमुख, जगदीश शिंदे, सौदागर जगताप, विकास जाधव, दत्ता पाटील, अमोल मुळे, आकाश पाटील, ओंकार सारडे आदी पदाधिकाऱ्यांसह शेतकरी मोठ्या संख्येने उपस्थित होते.