उमरगा : उमरगा तालुक्यातील नारंगवाडी शिवारात असलेल्या जेएसडब्ल्यू (JSW) पवनचक्की वीज निर्मिती प्रकल्पातून अज्ञात चोरट्यांनी तब्बल १४ लाख ७१ हजार रुपयांच्या केबल वायरची चोरी केल्याचा मोठा प्रकार उघडकीस आला आहे. या प्रकरणी रविवारी (ता. २६) उमरगा पोलीस ठाण्यात अज्ञात व्यक्तीविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, नारंगवाडी शिवारात जेएसडब्ल्यू पवनचक्की वीज निर्मिती प्रकल्पाचे झिरो पॉईंट आहे. या ठिकाणी प्रकल्पासाठी आवश्यक असलेले चार नेसल (Nacelle क्र. २४२१३२१, २४२१३२६, २४२१३२७ आणि २४२१३२९) ठेवण्यात आले होते. दरम्यान, ८ जानेवारी २०२६ ते ११ मार्च २०२६ दुपारी अडीच वाजेपर्यंतच्या कालावधीत अज्ञात चोरट्यांनी या ठिकाणी डल्ला मारला.
चोरट्यांनी या चारही नेसलमधील लाखो रुपये किमतीच्या केबल वायर कापून चोरून नेल्या. चोरीला गेलेल्या या केबल वायरची अंदाजे किंमत १४ लाख ७१ हजार ०२४ रुपये इतकी आहे. हा प्रकार लक्षात आल्यानंतर, प्रकल्पाचे काम पाहणारे शाम शेळके यांनी रविवारी (ता. २६ एप्रिल) उमरगा पोलीस ठाण्यात धाव घेत फिर्याद दिली.
शेळके यांच्या प्रथम खबरीवरून उमरगा पोलिसांनी अज्ञात व्यक्तीविरुद्ध भारतीय न्याय संहिता (भा.न्या.सं.) कलम ३०३(२) अन्वये चोरीचा गुन्हा दाखल केला आहे. या मोठ्या चोरीमुळे परिसरात खळबळ उडाली असून, पोलीस चोरट्यांचा कसून शोध घेत आहेत.
ठळक मुद्दे:
-
घटनास्थळ: जेएसडब्ल्यू पवनचक्की प्रकल्प, झिरो पॉईंट (नारंगवाडी शिवार, ता. उमरगा)
-
चोरीला गेलेला मुद्देमाल: पवनचक्कीच्या ४ नेसलमधील १४ लाख ७१ हजार ०२४ रुपयांची केबल वायर.
-
गुन्हा दाखल: उमरगा पोलीस ठाण्यात भा.न्या.सं. कलम ३०३(२) अन्वये अज्ञात व्यक्तीवर गुन्हा.
