धाराशिव : येथील जिल्हा विधीज्ञ मंडळाच्या अत्यंत चुरशीच्या ठरलेल्या वार्षिक निवडणुकीत अध्यक्षपदी अॅड. खंडेराव हरिश्चंद्र चौरे यांनी मोठ्या मताधिक्याने बाजी मारली. त्यांनी आपले प्रतिस्पर्धी अॅड. सुधाकर तांबे यांचा तब्बल १९८ मतांनी पराभव करत विजयश्री संपादन केली. निकाल जाहीर होताच विजयी उमेदवारांच्या समर्थकांनी न्यायालय परिसरात गुलाल उधळून एकच जल्लोष केला.
जिल्हा विधीज्ञ मंडळाच्या नूतन कार्यकारिणीसाठी यंदा मोठी चुरस पाहायला मिळाली. काही जागा बिनविरोध झाल्यानंतर अध्यक्ष, उपाध्यक्ष (सर्वसाधारण), उपाध्यक्ष (महिला राखीव) आणि महिला प्रतिनिधी अशा प्रमुख चार पदांसाठी प्रत्यक्ष मतदान झाले. यात अध्यक्षपदासाठी तीन उमेदवार रिंगणात होते. मात्र, मुख्य लढतीत अॅड. खंडेराव चौरे यांनी वर्चस्व सिद्ध केले. अॅड. चौरे यांनी १९८ मताधिक्य घेत अध्यक्षपदाला गवसणी घातली, तर पराभूत उमेदवार अॅड. तांबे यांना १३४ मते मिळाली. नवनिर्वाचित अध्यक्ष अॅड. चौरे हे भाजपचे माजी जिल्हाध्यक्ष असून, पक्षातील एक सक्रिय पदाधिकारी म्हणून त्यांची ओळख आहे.
इतर पदांवरील निकाल दृष्टिक्षेपात:
-
उपाध्यक्ष (सर्वसाधारण): या पदासाठी अॅड. सुधीर विठ्ठलराव नन्नवरे आणि अॅड. इंद्रजित चिंतामणराव शिंदे यांच्यात लढत झाली. एकूण ५१४ मतांपैकी अॅड. नन्नवरे यांनी तब्बल ४१४ मते घेत एकतर्फी विजय मिळवला. अॅड. शिंदे यांना केवळ ७८ मतांवर समाधान मानावे लागले. अॅड. नन्नवरे हे ३३६ मतांच्या मोठ्या फरकाने विजयी झाले.
-
उपाध्यक्ष (महिला राखीव): या पदासाठी अॅड. सारिका नागनाथ मुंडे-पाटील आणि अॅड. उज्वला गोरख इंगळे यांच्यात थेट लढत झाली. एकूण ५१९ वैध मतांपैकी अॅड. मुंडे-पाटील यांनी २९५ मते मिळवत अॅड. इंगळे (२०२ मते) यांचा ९३ मतांनी पराभव केला.
-
महिला प्रतिनिधी: या लक्षवेधी लढतीत अॅड. अर्चना रामहरी नवले यांनी जोरदार बाजी मारली. त्यांनी अॅड. मायादेवी सुभाष सरवदे यांचा तब्बल २१४ मतांनी मोठ्या फरकाने पराभव करत विजय खेचून आणला.
या संपूर्ण निवडणूक प्रक्रियेत मुख्य निवडणूक निर्णय अधिकारी म्हणून अॅड. नितीन भोसले यांनी चोख कामकाज पाहिले. दरम्यान, विजयाची अधिकृत घोषणा होताच सर्व विजयी उमेदवारांचा समर्थकांकडून सत्कार करण्यात आला. गुलालाची मुक्त उधळण करत व पेढे वाटून वकिलांनी हा विजयोत्सव साजरा केला.
