तुळजापूर : तुळजापूर तालुक्यातील शिराढोण येथील एका शेतातून १५ वर्षीय अल्पवयीन मुलाचे अज्ञात व्यक्तीने अपहरण केल्याची खळबळजनक घटना उघडकीस आली आहे. याप्रकरणी तुळजापूर पोलीस ठाण्यात अज्ञाताविरुद्ध अपहरणाचा गुन्हा दाखल करण्यात आला आहे.
संतोष रंगनाथ कोकरे (वय १५) असे अपहरण झालेल्या मुलाचे नाव आहे.
याबाबत पोलिसांनी दिलेली अधिक माहिती अशी की, रंगनाथ भिवाजी कोकरे (वय ३६, मूळ रा. काळमवाडी, पोस्ट पिलीव, ता. माळशिरस, जि. सोलापूर) हे सध्या कुटुंबासह शिराढोण येथील सुशांत देशमुख यांच्या शेतात वास्तव्यास आहेत. रविवारी (दि. ३ मे) सायंकाळी ५ वाजेच्या सुमारास त्यांचा मुलगा संतोष हा सुशांत देशमुख यांच्या शेतात होता. त्यावेळी अज्ञात व्यक्तीने अज्ञात कारणासाठी त्याला तेथून पळवून नेले.
मुलाचा सर्वत्र शोध घेऊनही तो न सापडल्याने, अखेर मुलाचे वडील रंगनाथ कोकरे यांनी बुधवारी (दि. ६ मे) तुळजापूर पोलीस ठाण्यात धाव घेऊन फिर्याद दिली. या प्रथम खबरेवरून अज्ञात व्यक्तीविरुद्ध भारतीय न्याय संहिता (BNS) कलम १३७ (२) अन्वये अपहरणाचा गुन्हा नोंदवण्यात आला आहे. या प्रकरणाचा पुढील तपास तुळजापूर पोलीस करत आहेत.
