वाशी – चारित्र्यावर वारंवार संशय घेऊन सासरच्या मंडळींकडून होत असलेल्या शारीरिक व मानसिक जाचाला कंटाळून एका विवाहितेने विषारी औषध पिऊन आत्महत्या केल्याची धक्कादायक घटना वाशी तालुक्यातील इंदिरा पारधी पिढी पारा येथे घडली. याप्रकरणी पतीसह पाच जणांविरुद्ध वाशी पोलीस ठाण्यात गुन्हा दाखल करण्यात आला आहे.
बाली मच्छिंद्र शिंदे असे आत्महत्या केलेल्या विवाहितेचे नाव आहे.
पोलिसांनी दिलेल्या माहितीनुसार, बाली हिच्या चारित्र्यावर संशय घेऊन सासरची मंडळी तिला सतत त्रास देत होती. तिला वारंवार शिवीगाळ करून मारहाण केली जात होती. या रोजच्या जाचाला कंटाळून बाली हिने २२ एप्रिल २०२६ रोजी सकाळी १० वाजेच्या सुमारास इंदिरा पारधी पिढी पारा येथील राहत्या घरी विषारी औषध प्राशन करून आपली जीवनयात्रा संपवली.
याप्रकरणी धनंजय रामचंद्र काळे (वय ४२, रा. ब्रम्हनाथ पारधी पिढी, ता. वाशी, जि. धाराशिव) यांनी बुधवारी (दि. ६ मे) वाशी पोलीस ठाण्यात फिर्याद दिली. या तक्रारीवरून बाली हिला आत्महत्येस प्रवृत्त केल्याच्या आरोपाखाली खालील पाच जणांवर गुन्हा दाखल करण्यात आला आहे:
-
मच्छिंद्र शहाजी शिंदे (पती)
-
महादेव शहाजी शिंदे (दीर)
-
पिंकी महादेव शिंदे (भावजय/जाऊ)
-
शहाजी भिमा शिंदे (सासरे)
-
मनुबाई शहाजी शिंदे (सासू)
(सर्व रा. इंदिरा पारधी पिढी पारा, ता. वाशी, जि. धाराशिव
फिर्यादीवरून वाशी पोलिसांनी सर्व आरोपींविरुद्ध भारतीय न्याय संहिता (BNS) कलम १०८, ११५(२) आणि ३(५) अन्वये गुन्हा नोंदवला आहे. या प्रकरणाचा पुढील तपास वाशी पोलीस करत आहेत.
