मुरुम : चुलत भावाला मारहाण का केली, याचा जाब विचारण्यासाठी गेलेल्या एका तरुणाला शिवीगाळ करत चाकूने हल्ला करून गंभीर जखमी केल्याची घटना लोहारा तालुक्यातील आष्टा कासार येथे घडली. याप्रकरणी मुरुम पोलीस ठाण्यात मंगळवारी (ता. ५) तिघांवर गुन्हा दाखल करण्यात आला आहे.
सुशीलकुमार मल्लीनाथ आळंगे (वय ३६, रा. आष्टा कासार, ता. लोहारा, जि. धाराशिव) असे चाकू हल्ल्यात गंभीर जखमी झालेल्या फिर्यादी तरुणाचे नाव आहे. तर कृष्णा मदने, सचिन मदने आणि सागर मदने (सर्व रा. आष्टा कासार) अशी गुन्हा दाखल झालेल्या आरोपींची नावे आहेत.
पोलिसांनी दिलेल्या माहितीनुसार, आष्टा कासार येथील प्रकाश पांढरे यांच्या दुकानासमोर २८ एप्रिल रोजी सायंकाळी साडेसात ते आठ वाजेच्या सुमारास ही घटना घडली. फिर्यादी सुशीलकुमार आळंगे यांच्या चुलत भावाला आरोपींनी काही कारणावरून मारहाण केली होती. ‘तुम्ही माझ्या भावाला का मारले?’ अशी विचारणा करण्यासाठी सुशीलकुमार हे आरोपींकडे गेले होते.
याचाच राग आल्याने कृष्णा, सचिन आणि सागर या तिन्ही आरोपींनी सुशीलकुमार यांना शिवीगाळ करण्यास सुरुवात केली. तसेच लाथाबुक्क्यांनी बेदम मारहाण करत त्यांच्यावर चाकूने हल्ला केला. या जीवघेण्या हल्ल्यात सुशीलकुमार हे गंभीर जखमी झाले आहेत.
या प्रकरणी उपचारांनंतर सुशीलकुमार आळंगे यांनी ५ मे रोजी मुरुम पोलीस ठाण्यात दिलेल्या प्रथम खबरीवरून कृष्णा मदने, सचिन मदने आणि सागर मदने या तिघांविरुद्ध भारतीय न्याय संहिता (BNS) कलम ११८(२) आणि ३(५) अन्वये गुन्हा दाखल करण्यात आला आहे. या प्रकरणाचा पुढील तपास मुरुम पोलीस करत आहेत.
