मुरुम : मागील भांडणाचा राग मनात धरून दोन तरुणांनी एका २२ वर्षीय तरुणाला शिवीगाळ करत हंटर आणि तलवारीच्या पट्ट्याने बेदम मारहाण केल्याची घटना समोर आली आहे. या प्राणघातक हल्ल्यात तरुण गंभीर जखमी झाला असून, याप्रकरणी मुरुम पोलीस ठाण्यात दोघांविरुद्ध गुन्हा दाखल करण्यात आला आहे.
अजय अनिल देडे (वय २२, रा. साठे नगर, येणेगूर, ता. उमरगा, जि. धाराशिव, सध्या रा. काळेवाडी, पिंपरी-चिंचवड, पुणे) असे या मारहाणीत गंभीर जखमी झालेल्या तरुणाचे नाव आहे.
पोलिसांनी दिलेल्या माहितीनुसार, ५ मे २०२६ रोजी सायंकाळी साडेचार वाजण्याच्या सुमारास अजगर हुसेनी दर्ग्याच्या पाठीमागे ही घटना घडली. आरोपी चनवीर तुकाराम बाबुगोळ आणि सोन्या उर्फ प्रदीप मोहन मंडले (दोघे रा. बेरवाडी, ता. उमरगा, जि. धाराशिव) यांनी जुन्या भांडणाच्या कारणावरून अजय देडे याला गाठले. सुरुवातीला त्यांनी अजयला शिवीगाळ करत लाथाबुक्क्यांनी मारहाण करण्यास सुरुवात केली. त्यानंतर सोबत आणलेल्या हंटर आणि तलवारीच्या पट्ट्याने अजयला जबर मारहाण करून गंभीर जखमी केले.
या घटनेनंतर जखमी अजय देडे याने दिलेल्या फिर्यादीवरून मुरुम पोलीस ठाण्यात आरोपी चनवीर बाबुगोळ आणि सोन्या उर्फ प्रदीप मंडले या दोघांविरुद्ध मारहाण व दुखापत केल्याप्रकरणी गुन्हा दाखल करण्यात आला आहे. या प्रकरणाचा पुढील तपास मुरुम पोलीस करत आहेत.
