धाराशिव जिल्ह्यात चोरी आणि घरफोडीचे सत्र; परंड्यात महिलेला मारहाण करून लूट, तर तीन दुचाकींसह ट्रकचा माल लंपास

धाराशिव  : धाराशिव जिल्ह्यात चोरी, घरफोडी आणि वाहन चोरीच्या घटनांमध्ये मोठी वाढ झाली असून, नागरिकांमध्ये भीतीचे वातावरण आहे. एकाच दिवशी परंडा, उमरगा, तुळजापूर, भूम आणि येरमाळा पोलीस ठाण्यांच्या हद्दीत चोरीचे गुन्हे दाखल झाले आहेत. परंडा येथे घरात घुसून एका महिलेला मारहाण करत सोन्या-चांदीचे दागिने लुटल्याची खळबळजनक घटना घडली आहे, तर येरमाळा हद्दीत ट्रकमधून लाखो रुपयांचा माल पळवण्यात आला आहे. याशिवाय जिल्ह्यातून तीन दुचाकींची चोरी झाली आहे.

परंड्यात घरात घुसून महिलेला मारहाण आणि लूट

माळी गल्ली (परंडा) येथे राहणाऱ्या संगीता अजिनाथ आलबते (वय ५०) यांच्या घरात ८ मे रोजी मध्यरात्री ३ वाजेच्या सुमारास तीन अज्ञात चोरट्यांनी प्रवेश केला. त्यातील एकाने संगीता यांच्या डोक्यावर आणि डाव्या हाताच्या पोटरीवर काठीने मारहाण करून त्यांना गंभीर जखमी केले. यानंतर चोरट्यांनी त्यांच्या आणि सुनेच्या गळ्यातील सोन्याचे मंगळसूत्र व घरातील चांदीचे दागिने बळजबरीने हिसकावून नेले. याप्रकरणी संगीता आलबते यांच्या फिर्यादीवरून परंडा पोलीस ठाण्यात भारतीय न्याय संहिता (BNS) कलम ३०९(६), ३(५) अन्वये गुन्हा नोंदवण्यात आला आहे.

येरमाळा हद्दीत ट्रकमधून २ लाखांचे कपडे लंपास

महामार्गावर ट्रकची ताडपत्री कापून माल चोरणारी टोळी पुन्हा सक्रिय झाली आहे. फिर्यादी सोमनाथ भारत विसेकर (रा. दौंड, सध्या रा. बार्शी) यांच्या ट्रकमधून २ मे रोजी मध्यरात्री १ ते १.३० च्या सुमारास अज्ञात चोरट्यांनी ताडपत्री कापून २ लाख १९ हजार ३५४ रुपये किमतीचे कपड्यांचे दोन डाग (बंडल) चोरून नेले. याप्रकरणी विसेकर यांच्या तक्रारीवरून ९ मे रोजी येरमाळा पोलीस ठाण्यात गुन्हा दाखल करण्यात आला आहे.

जिल्ह्यातून तीन दुचाकींची चोरी

जिल्ह्यात दुचाकी चोरीच्या घटनांनी डोकेवर काढले असून, तीन वेगवेगळ्या ठिकाणाहून दुचाकी चोरीला गेल्या आहेत:

• उमरगा: विक्रम माधवराव इंगळे (रा. एकोंडी, ता. उमरगा) यांची ४५ हजार रुपये किमतीची होंडा युनिकॉर्न (MH 25 AY 7676) ही दुचाकी ८ मे रोजी ओम बालाजी मंगल कार्यालय परिसरातून अज्ञात व्यक्तीने चोरून नेली. याप्रकरणी उमरगा पोलिसांत गुन्हा दाखल करण्यात आला आहे.

• तुळजापूर: संतनाथ अशोक देवकते (रा. वैराग, सध्या रा. तुळजापूर) यांची ३० हजार रुपये किमतीची हिरो दुचाकी (MH 13 DN 8275) ६ मे रोजी दुपारी नळदुर्ग रोडवरील आयडीबीआय बँकेसमोरून चोरीस गेली. तुळजापूर पोलीस ठाण्यात गुन्हा नोंदवण्यात आला आहे.

• भूम: दत्तात्रय परशुराम कदम (सध्या रा. समर्थ नगर, भूम) यांची ३० हजार रुपये किमतीची होंडा शाईन (MH 25 X 6397) ही दुचाकी २३ एप्रिल रोजी बागवान गल्ली येथील शेंडगे यांच्या किराणा दुकानासमोरून चोरीला गेली. याप्रकरणी भूम पोलिसांत गुन्हा दाखल करण्यात आला आहे.

या सर्व घटनांप्रकरणी संबंधित पोलीस ठाण्यात अज्ञात आरोपींविरुद्ध गुन्हे दाखल करण्यात आले असून, पोलीस परिसरातील सीसीटीव्ही फुटेज तपासून अधिक तपास करत आहेत.