परंडा : जुन्या भांडणाचा राग मनात धरून एका २२ वर्षीय तरुणाला भरचौकात गाठून शिवीगाळ करत त्याच्यावर चाकू आणि लोखंडी गजाने हल्ला केल्याची घटना परंडा तालुक्यातील जवळा (नि.) येथे रविवारी (ता. १०) दुपारी साडेतीन वाजेच्या सुमारास घडली. याप्रकरणी परंडा पोलीस ठाण्यात तिघांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, संतोष नागनाथ कारकर (वय २२, रा. जवळा नि., ता. परंडा, जि. धाराशिव) असे जखमी झालेल्या तरुणाचे नाव आहे. त्यांनी याप्रकरणी परंडा पोलीस ठाण्यात फिर्याद दिली आहे.
रविवारी दुपारी साडेतीन वाजेच्या सुमारास संतोष कारकर हे जवळा (नि.) येथील बाजार चौकात उभे होते. यावेळी आरोपी योगेश दत्ता राऊत, तुषार बबन राऊत आणि आदेश अण्णा राऊत (सर्व रा. जवळा नि., ता. परंडा) हे तिघे तिथे आले. त्यांनी मागील भांडणाचे कारण उकरून काढून संतोष यांना शिवीगाळ करण्यास सुरुवात केली. त्यानंतर या तिघांनी संगनमत करून संतोषला लाथाबुक्क्यांनी बेदम मारहाण केली. एवढ्यावरच न थांबता आरोपींनी त्यांच्याजवळील चाकू आणि लोखंडी गजाने मारहाण करून संतोष यांना जखमी केले.
भरबाजारात झालेल्या या घटनेमुळे परिसरात काही काळ तणावाचे वातावरण निर्माण झाले होते. याप्रकरणी संतोष कारकर यांनी रविवारी (ता. १०) दिलेल्या प्रथम खबरीवरून परंडा पोलीस ठाण्यात योगेश राऊत, तुषार राऊत आणि आदेश राऊत या तीन आरोपींविरुद्ध भारतीय न्याय संहितेच्या (BNS) कलम ११८(१), ११५(२), ३५२, ३५१(२), ३(५) अन्वये गुन्हा नोंदवण्यात आला आहे. या प्रकरणाचा पुढील तपास परंडा पोलीस करत आहेत.
