आनाळा : परंडा तालुक्यातील आनाळा येथे एका व्यक्तीच्या घरात घुसून तिघांनी तलवार आणि हॉकी स्टिकने बेदम मारहाण केल्याची धक्कादायक घटना उघडकीस आली आहे. हा प्रकार बुधवारी (ता. १३) सायंकाळी पावणेआठ वाजेच्या सुमारास घडला. याप्रकरणी गुरुवारी (ता. १४) आंबी पोलीस ठाण्यात तिघांविरुद्ध शस्त्रास्त्र कायद्यासह विविध गंभीर कलमांन्वये गुन्हा दाखल करण्यात आला आहे.
तुकाराम चांगदेव शिंदे (वय ४८, रा. आनाळा, ता. परंडा, जि. धाराशिव) असे या हल्ल्यात जखमी झालेल्या व्यक्तीचे नाव असून, त्यांनी यासंदर्भात फिर्याद दिली आहे.
पोलिसांनी दिलेल्या माहितीनुसार, बुधवारी (ता. १३) सायंकाळी १९.४५ वाजेच्या सुमारास तुकाराम शिंदे हे त्यांच्या घरी असताना आरोपी अतुल सुभाष जाधव (रा. मिरजगाव, ता. कर्जत), विशाल तनपुरे (रा. गोंदडी, ता. कर्जत) आणि राम बोरंडे (रा. घोगरगाव, ता. श्रीगोंदा, जि. अहिल्यानगर) यांनी त्यांच्या घरात बळजबरीने प्रवेश केला. घरात घुसताच आरोपींनी तुकाराम यांना शिवीगाळ करण्यास सुरुवात केली. त्यानंतर लाथाबुक्क्यांनी मारहाण करत सोबत आणलेल्या तलवारीने आणि हॉकी स्टिकने त्यांच्यावर हल्ला चढवला. या भयंकर हल्ल्यात तुकाराम शिंदे हे जखमी झाले आहेत.
मारहाण केल्यानंतर आरोपींनी ‘तुला जिवंत सोडणार नाही’ अशी जिवे ठार मारण्याची धमकी देऊन तेथून पोबारा केला. या घटनेमुळे परिसरात काही काळ दहशत पसरली होती.
या घटनेनंतर तुकाराम शिंदे यांनी आंबी पोलीस ठाण्यात धाव घेत घडलेला प्रकार सांगितला. त्यांनी दिलेल्या प्रथम खबरीवरून आंबी पोलीस ठाण्यात आरोपी अतुल जाधव, विशाल तनपुरे आणि राम बोरंडे या तीनही जणांविरुद्ध भारतीय न्याय संहितेच्या (भा.न्या.सं.) कलम ३३३, ११८(१), ११५(२), ३५२, ३५१(२)(३), ३(५) सह शस्त्र अधिनियम कलम ४/२५ (शस्त्र बाळगणे व वापरणे) अन्वये गुन्हा नोंदवण्यात आला आहे. या प्रकरणाचा अधिक तपास आंबी पोलीस करत आहेत.
