परंडा : चुलत बहिणीच्या लग्नात सगळ्यांच्या पुढे का नाचत होतास? या क्षुल्लक कारणावरून एका तरुणाला शिवीगाळ करत त्याच्यावर लोखंडी कोयत्याने वार करून गंभीर जखमी केल्याची धक्कादायक घटना परंडा तालुक्यातील सरणवाडी येथे घडली. हा प्रकार बुधवारी (ता. १३) सायंकाळी सहा वाजेच्या सुमारास घडला. याप्रकरणी गुरुवारी (ता. १४) परंडा पोलीस ठाण्यात चौघांविरुद्ध गुन्हा दाखल करण्यात आला आहे.
दीपक भारत जाधव (वय ३०, रा. सरणवाडी, ता. परंडा, जि. धाराशिव) असे हल्ल्यात गंभीर जखमी झालेल्या तरुणाचे नाव असून, त्यांनी याप्रकरणी पोलिसांत फिर्याद दिली आहे.
पोलिसांनी दिलेल्या माहितीनुसार, बुधवारी (ता. १३) सायंकाळी सहा वाजेच्या सुमारास सरणवाडी येथील सूर्यकांत कदम यांच्या घराजवळ दीपक जाधव हे असताना, आरोपी विशाल अर्जुन साबळे, वैभव लक्ष्मण जाधव, गणेश लक्ष्मण जाधव आणि लक्ष्मण धर्मा जाधव (सर्व रा. सरणवाडी) हे त्याठिकाणी आले. त्यांनी दीपक यांना, ‘तू तुझ्या चुलत बहिणीच्या लग्नात सगळ्यांच्या पुढे का नाचत होतास?’ असा जाब विचारत वाद घालण्यास सुरुवात केली.
याच कारणावरून चिडलेल्या आरोपींनी दीपक यांना शिवीगाळ करत लाथाबुक्क्यांनी मारहाण केली. तसेच, सोबत आणलेल्या लोखंडी कोयत्याने वार करून त्यांना गंभीर जखमी केले व जिवे ठार मारण्याची धमकी दिली.
या घटनेनंतर दीपक जाधव यांनी दिलेल्या प्रथम खबरीवरून परंडा पोलीस ठाण्यात गुरुवारी (ता. १४) आरोपी विशाल साबळे, वैभव जाधव, गणेश जाधव आणि लक्ष्मण जाधव या चारही जणांविरुद्ध भारतीय न्याय संहितेच्या (भा.न्या.सं.) कलम ११८(२), ११५(२), ३५२, ३५१(२) आणि ३(५) नुसार गुन्हा दाखल करण्यात आला आहे. या प्रकरणाचा पुढील तपास परंडा पोलीस करत आहेत.
