उमरगा : माहेरून पैसे आणण्यासाठी सासरच्या मंडळींकडून होत असलेल्या शारीरिक व मानसिक छळाला कंटाळून एका २७ वर्षीय विवाहितेने राहत्या घरी गळफास घेऊन आत्महत्या केल्याची धक्कादायक घटना उमरगा तालुक्यातील कुन्हाळी येथे घडली. रविवारी (ता. १७) सकाळी सहा वाजेच्या सुमारास हा प्रकार उघडकीस आला. याप्रकरणी उमरगा पोलिस ठाण्यात पतीसह पाच जणांविरुद्ध गुन्हा दाखल करण्यात आला आहे.
सोनी रणजित गोजले (वय २७, रा. कुन्हाळी, ता. उमरगा, जि. धाराशिव) असे आत्महत्या केलेल्या दुर्दैवी विवाहितेचे नाव आहे.
याबाबत पोलिसांनी दिलेली अधिक माहिती अशी की, कुन्हाळी येथील सोनी गोजले हिने माहेरून पैसे आणावेत, या कारणावरून सासरच्या मंडळींकडून तिचा सातत्याने शारीरिक व मानसिक छळ केला जात होता. या रोजच्या जाचाला आणि त्रासाला कंटाळून सोनी हिने रविवारी (ता. १७) सकाळी सहा वाजेच्या सुमारास राहत्या घरी स्लॅबच्या हुकाला दोरीच्या साहाय्याने गळफास घेत आपली जीवनयात्रा संपवली.
या घटनेनंतर मयत सोनी यांचे नातेवाईक मारुती नागाप्पा इश्वरे (वय ५८, रा. वाडी कासार शिरसी, ता. निलंगा, जि. लातूर) यांनी उमरगा पोलिस ठाण्यात रविवारीच फिर्याद दिली. या दिलेल्या प्रथम खबरीवरून विवाहितेस आत्महत्येस प्रवृत्त केल्याच्या आरोपाखाली पती रणजित राजाराम गोजले, फुलाबाई राजाराम गोजले, बालाजी राजाराम गोजले, संजय राजाराम गोजले (सर्व रा. कुन्हाळी, ता. उमरगा) आणि शुभद्रा संजय भेगिले (रा. तुरोरी, ता. उमरगा) या पाच जणांविरुद्ध भारतीय न्याय संहिता (BNS) कलम ८५, १०८ आणि ३(५) अन्वये गुन्हा नोंदवण्यात आला आहे. या प्रकरणाचा पुढील तपास उमरगा पोलिस करत आहेत.
