येरमाळा: धाराशिव जिल्ह्यातील येरमाळा परिसरातील वडजी शिवारात स्थानिक गुन्हे शाखेने (एलसीबी) धडक कारवाई करत तब्बल ६२ लाख ४८ हजार रुपयांचा अवैध गुटखा आणि सुगंधी तंबाखू जप्त केला आहे. या कारवाईत एका आरोपीला अटक करण्यात आली असून, त्याचे इतर साथीदार पसार झाले आहेत. पोलिसांकडून पसार आरोपींचा कसून शोध सुरू आहे.
पोलिसांनी दिलेल्या माहितीनुसार, पोलीस अधीक्षक रितू खोखर आणि अपर पोलीस अधीक्षक शफकत आमना यांच्या मार्गदर्शनाखाली स्थानिक गुन्हे शाखेचे पथक अवैध धंद्यांवर कारवाई करण्यासाठी जिल्ह्यात पेट्रोलिंग करत होते. यावेळी एलसीबीचे पथक येरमाळा येथे आले असता, त्यांना गोपनीय माहिती मिळाली. वडजी शिवारातील डोंगरात असलेल्या तलावाजवळ एका लिंबाच्या झाडाखाली ताडपत्रीने झाकून गुटख्याची पोती विक्रीसाठी लपवून ठेवली आहेत आणि तिथे तेरखेडा (लक्ष्मी पारधी पिढी) येथील काही जण थांबले आहेत, अशी खात्रीलायक माहिती पोलिसांना मिळाली.
या माहितीच्या आधारे स्थानिक गुन्हे शाखेचे पोलीस निरीक्षक विनोद इज्जपवार यांनी तत्काळ येरमाळा गाठले. त्यांनी येरमाळा पोलीस ठाण्याचे सहायक पोलीस निरीक्षक भालेराव आणि कर्मचाऱ्यांना सोबत घेऊन सदर ठिकाणी सापळा रचला. पोलिसांची चाहूल लागताच लिंबाच्या झाडाखाली बसलेल्या सात ते आठ जणांनी पळ काढण्यास सुरुवात केली. पोलिसांनी पाठलाग करून डोंगरातून छगन बिसराम शिंदे (रा. लक्ष्मी पारधी पिढी, तेरखेडा) याला शिताफीने पकडले.
६२ लाखांचा मुद्देमाल हस्तगत
पकडलेल्या आरोपीकडे चौकशी केली असता, त्याने ताडपत्रीखालील पोत्यांमध्ये गुटखा असल्याची कबुली दिली. तसेच हा माल मस्सा आणि तेरखेडा येथील साथीदारांसोबत आणल्याचे त्याने सांगितले. पोलिसांनी ताडपत्री हटवून पाहणी केली असता, वेगवेगळ्या पोत्यांमध्ये ‘राजनिवास’ गुटखा आणि सुगंधी तंबाखू आढळून आली. पोलिसांनी घटनास्थळावरून गुटखा, सुगंधी तंबाखू आणि आरोपींच्या तीन मोटारसायकली असा एकूण ६२ लाख ४८ हजार ६० रुपयांचा मुद्देमाल जप्त केला आहे.
या प्रकरणी येरमाळा पोलीस ठाण्यात गुन्हा दाखल करण्यात आला असून, आरोपी छगन शिंदे याला पुढील कायदेशीर कारवाईसाठी येरमाळा पोलिसांच्या ताब्यात दिले आहे. ही यशस्वी कारवाई पोलीस निरीक्षक विनोद इज्जपवार, सपोनि सचिन खटके, सपोनि तात्याराव भालेराव यांच्यासह पोलीस हवालदार विनोद जानराव, नितीन जाधवर, बबन जाधवर, मपोह शोभा बांगर, चापोह महेबुब अरब, रोहित दंडनाईक आणि प्रकाश बोईनवाड यांच्या पथकाने पार पाडली.
