उमरगा : शेतीच्या वादात आपल्या पुतण्याची बाजू घेऊन कोर्टात साक्ष का दिली, या कारणावरून संतप्त झालेल्या भावानेच आपल्या सख्या ६२ वर्षीय ज्येष्ठ भावाला कुऱ्हाडीच्या दांडाने आणि लाथाबुक्क्यांनी अमानुष मारहाण केल्याची घटना उमरगा तालुक्यातील व्हंताळ येथे घडली आहे. या जीवघेण्या हल्ल्यात वृद्ध गंभीर जखमी झाले असून, आरोपीने त्यांना जिवे मारण्याची धमकीही दिली आहे. याप्रकरणी उमरगा पोलीस ठाण्यात गुन्हा दाखल करण्यात आला आहे.
राजाभाऊ श्रीमंतराव जाधव (वय ६२, रा. व्हंताळ, ता. उमरगा, जि. धाराशिव) असे मारहाणीत गंभीर जखमी झालेल्या वृद्धाचे नाव आहे. त्यांच्या तक्रारीवरून सख्खा भाऊ संजय श्रीमंतराव जाधव (रा. सोलापूर) याच्याविरुद्ध गुन्हा नोंदवण्यात आला आहे.
साक्ष दिल्याने काढला सुड
पोलीसांकडून मिळालेल्या माहितीनुसार, २४ मे २०२६ रोजी सकाळी साडेआठ वाजेच्या सुमारास व्हंताळ येथे हा प्रकार घडला. फिर्यादी राजाभाऊ जाधव आणि संशयित आरोपी संजय जाधव यांच्यात शेतीवरून जुना वाद सुरू आहे. याच वादातून राजाभाऊ यांनी आपल्या मुलाची बाजू घेत न्यायालयात साक्ष दिली होती. याचाच राग मनात धरून सोलापूरहून आलेल्या संजय जाधव याने राजाभाऊ यांना गाठले आणि “माझ्याविरुद्ध साक्ष का दिली?” असे म्हणून थेट वाद घालण्यास सुरुवात केली.
कुऱ्हाडीच्या दांडाने हल्ला, जिवे मारण्याची धमकी
हा वाद इतका वाढला की, आरोपी संजय याने राजाभाऊ यांना अत्यंत अश्लील भाषेत शिवीगाळ करत लाथाबुक्क्यांनी मारहाण सुरू केली. एवढ्यावरच न थांबता त्याने जवळ असलेला कुऱ्हाडीचा दांडा घेऊन राजाभाऊ यांच्यावर सपासप वार केले. या गंभीर हल्ल्यात राजाभाऊ रक्तबंबाळ होऊन जमिनीवर कोसळले. यावेळी आरडाओरडा ऐकून लोक जमा झाले असता, आरोपीने “पुन्हा आडवा आलास तर जिवंत सोडणार नाही,” अशी जिवे मारण्याची धमकी देत तेथून पळ काढला.
उमरगा पोलिसांत गुन्हा नोंद
या हल्ल्यानंतर गंभीर जखमी झालेल्या राजाभाऊ यांच्यावर रुग्णालयात उपचार करण्यात आले. त्यानंतर त्यांनी २५ मे २०२६ रोजी उमरगा पोलीस ठाणे गाठून रीतसर फिर्याद दिली. राजाभाऊ जाधव यांच्या प्रथम खबरीवरून (FIR) आरोपी संजय श्रीमंतराव जाधव याच्याविरुद्ध भारतीय न्याय संहिता (BNS) कलम ११८(२), ११८(१), ११५(२), ३५२, ३५१(२) आणि ३५१(३) अन्वये गुन्हा दाखल करण्यात आला आहे. घटनेचा पुढील तपास उमरगा पोलीस करत आहेत.
