धाराशिव: “माझ्या शेतातील आंबे का घेऊन जातोस?” अशी विचारणा करत पोटच्या मुलाने आपल्या ८१ वर्षीय वृद्ध वडिलांना लोखंडी गज आणि फर्शीने अमानुष मारहाण केल्याची धक्कादायक घटना सांजा येथील दत्तनगर भागात घडली आहे. या मारहाणीत वृद्ध वडील गंभीर जखमी झाले असून, भांडण सोडवण्यास आलेल्या आईलाही मुलाने बेदम मारहाण केली. याप्रकरणी आनंदनगर पोलीस ठाण्यात नराधम मुलाबाहेर गुन्हा दाखल करण्यात आला आहे.
सोपान आप्पाराव अनभुले (वय ८१, रा. दत्तनगर, सांजा, ता. जि. धाराशिव) असे मारहाणीत गंभीर जखमी झालेल्या वृद्ध वडिलांचे नाव आहे. त्यांच्या तक्रारीवरून मुलगा रवींद्र सोपान अनभुले याच्याविरुद्ध गुन्हा नोंदवण्यात आला आहे.
लोखंडी गज आणि फर्शीने हल्ला
पोलीसांकडून मिळालेल्या माहितीनुसार, २० मे २०२६ रोजी दुपारी दोन वाजेच्या सुमारास दत्तनगर (सांजा) येथे हा प्रकार घडला. फिर्यादी सोपान अनभुले यांनी शेतातील आंबे घेतल्याच्या कारणावरून संतापलेला आरोपी मुलगा रवींद्र याने वडिलांशी वाद घालण्यास सुरुवात केली. वादाचे रूपांतर पुढे जीवघेण्या हल्ल्यात झाले. आरोपीने वृद्ध वडिलांना अत्यंत अश्लील भाषेत शिवीगाळ करत लाथाबुक्क्यांनी, लोखंडी गजाने आणि फर्शीच्या तुकड्याने बेदम मारहाण केली. या हल्ल्यात सोपान अनभुले हे गंभीर जखमी झाले.
सोडवण्यासाठी आलेल्या आईलाही झोडपले
वृद्ध पतीला मुलगा जीवघेणी मारहाण करत असल्याचे पाहून सोपान अनभुले यांच्या पत्नी तात्काळ भांडण सोडवण्यासाठी धावून आल्या. मात्र, क्रूर बनलेल्या आरोपी रवींद्रने आपल्या जन्मदात्या आईचाही मुलाहिजा ठेवला नाही. त्याने आईलाही अर्वाच्य भाषेत शिवीगाळ करत जबर मारहाण केली.
आनंदनगर पोलिसांत गुन्हा नोंद
या जीवघेण्या हल्ल्यानंतर जखमी सोपान अनभुले यांच्यावर रुग्णालयात उपचार सुरू होते. २५ मे २०२६ रोजी रुग्णालयातील त्यांच्या वैद्यकीय जबाबाच्या (MLC) आधारे आनंदनगर पोलीस ठाण्यात आरोपी रवींद्र सोपान अनभुले याच्याविरुद्ध भारतीय न्याय संहिता (BNS) कलम ११८(२), ११८(१), ११५(२) आणि ३५२ अन्वये गुन्हा दाखल करण्यात आला आहे. घटनेचा पुढील तपास आनंदनगर पोलीस करत आहेत.
