भूम : मोटार चोरीचा खोटा आळ आणून, व्हिडिओ काढून बदनामी केल्याच्या त्रासाला कंटाळून एका ४१ वर्षीय व्यक्तीने चिंचेच्या झाडाला गळफास लावून आत्महत्या केल्याची धक्कादायक घटना भूम तालुक्यातील बावी येथे घडली आहे. याप्रकरणी मयताच्या मुलाने दिलेल्या फिर्यादीवरून भूम पोलीस ठाण्यात गावातीलच पाच जणांविरुद्ध गुन्हा दाखल करण्यात आला आहे.
विलास काशीनाथ भोसले (वय ४१, रा. अंबिका नगर, बावी, ता. भूम, जि. धाराशिव) असे आत्महत्या केलेल्या व्यक्तीचे नाव आहे.
व्हिडिओ काढून केली बदनामी
मिळालेल्या माहितीनुसार, १८ मे २०२६ रोजी सायंकाळच्या सुमारास बावी शिवारातील विश्वनाथ भोसले यांच्या शेतात विलास भोसले यांनी चिंचेच्या झाडाला गळफास घेतला. आरोपींनी विलास भोसले हे तळ्यातील पाण्याची मोटार घेऊन जात असतानाचे छायाचित्रीकरण (व्हिडिओ) केले होते. हा व्हिडिओ इतरांना दाखवून ‘विलास यांनी मोटार चोरी केली आहे’ असे सांगत त्यांची परिसरात मोठी बदनामी केली. या खोट्या आरोपामुळे आणि मानसिक त्रासाला कंटाळून विलास भोसले यांनी टोकाचे पाऊल उचलल्याचे फिर्यादीत म्हटले आहे.
पाच जणांवर गुन्हे दाखल
याप्रकरणी मयताचा मुलगा प्रसाद विलास भोसले (वय २२, रा. अंबिका नगर, बावी) याने २५ मे रोजी भूम पोलीस ठाण्यात रीतसर तक्रार दाखल केली. त्यावरून पोलिसांनी आरोपी:
१. विश्वनाथ दिगंबर भोसले
२. लालू प्रकाश भोसले
३. प्रकाश विश्वनाथ भोसले
४. बाबू मारुती पिंपळे
५. उमेश रोहिदास राऊत (सर्व रा. बावी, ता. भूम)
या पाचही जणांविरुद्ध भारतीय न्याय संहिता (BNS) कलम १०८, ३५६ आणि ३(५) अन्वये गुन्हा नोंदवला आहे. या घटनेचा पुढील तपास भूम पोलीस करत आहेत.
