शिराढोण (कळंब): रात्री उशीर झाल्याने शेतमालकाने अत्यंत विश्वासाने सालगड्याकडे सांभाळण्यासाठी दिलेली ४ लाख २१ हजार रुपयांची रोख रक्कम घेऊन सालगडी पसार झाल्याची धक्कादायक घटना रांजणी (ता. कळंब) येथे घडली आहे. याप्रकरणी शिराढोण पोलीस ठाण्यात बीड जिल्ह्यातील एका सालगड्याविरुद्ध विश्वासघाताचा गुन्हा दाखल करण्यात आला आहे.
शमशोद्दीन इब्राहीम सय्यद (वय ५३, रा. रांजणी, ता. कळंब, जि. धाराशिव) असे फसवणूक झालेल्या शेतमालकाचे नाव असून त्यांनी याप्रकरणी शिराढोण पोलीस ठाण्यात अधिकृत फिर्याद दिली आहे. तर लक्ष्मण सिध्दु सलगर (रा. मंजरथ, ता. माजलगाव, जि. बीड) असे गुन्हा दाखल झालेल्या संशयित आरोपी सालगड्याचे नाव आहे.
पोलिसांनी दिलेल्या माहितीनुसार, संशयित आरोपी लक्ष्मण सलगर हा फिर्यादी शमशोद्दीन सय्यद यांच्या शेतात सालगडी (गडी) म्हणून काम करत होता. २८ मार्च २०२६ रोजी शमशोद्दीन यांनी शेतातील काही साहित्य खरेदी करण्यासाठी ४ लाख २१ हजार रुपयांची रोख रक्कम आणली होती. मात्र, रात्री १० वाजेच्या सुमारास बराच उशीर झाल्यामुळे आणि सुरक्षेचा उपाय म्हणून त्यांनी ही रक्कम सालगडी लक्ष्मण याच्याकडे विश्वासाने सांभाळण्यासाठी दिली.
२८ मार्चच्या रात्री १० ते २९ मार्चच्या सकाळी ७ वाजेपूर्वीच्या दरम्यान, सालगडी लक्ष्मण सलगर याने मालकाच्या याच विश्वासाला तडा दिला. तो ती सव्वाचार लाखांची रोकड घेऊन शेतातून कोणालाही न सांगता अंधारात निघून गेला. सकाळी हा प्रकार उघडकीस आल्यानंतर शमशोद्दीन यांनी त्याची शोधाशोध केली, मात्र तो मिळून आला नाही.
अखेर काल (ता. २४ मे) शमशोद्दीन सय्यद यांनी शिराढोण पोलीस ठाण्यात धाव घेऊन तक्रार नोंदवली. त्यांच्या प्रथम खबरेवरून पोलिसांनी आरोपी लक्ष्मण सलगर याच्याविरुद्ध भारतीय न्याय संहिता (BNS) कलम ३१६(२) आणि ३१६(४) अन्वये (विश्वासघात व फसवणूक) गुन्हा दाखल केला आहे. या प्रकरणाचा पुढील तपास पोलीस करत आहेत.
