तेर / ढोकी: धाराशिव तालुक्यातील ऐतिहासिक तेर नगरीत अमली पदार्थांच्या विरोधात ढोकी पोलिसांनी एक मोठी कारवाई केली आहे. तेर येथील पारधी पिढी परिसरातील एका घरावर छापा टाकून पोलिसांनी तब्बल ८० हजार रुपये किमतीचा गांजा जप्त केला आहे. याप्रकरणी एका ४५ वर्षीय संशयित आरोपीला अमली पदार्थ विरोधी कायद्यान्वये (NDPS Act) अटक करण्यात आली आहे.
अच्युत प्रभू पवार (वय ४५, रा. पारधी पिढी, तेर, ता. जि. धाराशिव) असे अटक करण्यात आलेल्या संशयित आरोपीचे नाव आहे.
गुप्त माहितीवरून टाकली धाड
तेर येथील पारधी पिढी भागात एका घरात विक्रीच्या उद्देशाने गांजा साठवून ठेवण्यात आल्याची खात्रीशीर माहिती ढोकी पोलीस ठाण्याच्या पथकाला मिळाली होती. या माहितीच्या आधारे पोलिसांच्या पथकाने बुधवारी (दि. २७ मे) दुपारी सव्वाएक वाजेच्या सुमारास संशयित अच्युत पवार याच्या राहत्या घरावर अचानक छापा टाकला.
साडी सेंटरच्या पिशवीत लपवला होता गांजा
पोलिसांनी घराची झडती घेतली असता, एका खोलीत गुलाबी आणि लाल रंगाची ‘सुमैय्या साडी सेंटर’ची कापडी पिशवी आढळून आली. या पिशवीची तपासणी केली असता, त्यात काळपट हिरव्या रंगाचा आणि उग्र वास येत असलेला गांजा (पाने, बिया व काड्यांसह) तसेच लहान प्लास्टिकच्या ८ पुड्या मिळून आल्या.
या संपूर्ण साहित्यासह जप्त केलेल्या गांजाचे एकूण वजन १ किलो ६०० ग्रॅम इतके असून, आंतरराष्ट्रीय बाजारपेठेत त्याची किंमत अंदाजे ८० हजार रुपये आहे. पोलिसांनी हा सर्व मुद्देमाल जागीच जप्त करून आरोपीला बेड्या ठोकल्या.
NDPS कायद्यांतर्गत गुन्हा दाखल
बेकायदेशीररित्या अमली पदार्थांची साठवणूक आणि विक्री करण्याचा प्रयत्न केल्याप्रकरणी आरोपी अच्युत पवार याच्याविरुद्ध ढोकी पोलीस ठाण्यात ‘अमली पदार्थ प्रतिबंधक कायदा’ (NDPS Act) कलम ८(क) आणि २०(ब)(ii)(अ) अन्वये गुन्हा दाखल करण्यात आला आहे. या कारवाईमुळे अमली पदार्थ विक्रेत्यांचे धाबे दणाणले असून, ढोकी पोलीस या प्रकरणाचा पुढील तपास करत आहेत.
