धाराशिव: कत्तलीच्या उद्देशाने गोवंशीय जनावरांची अत्यंत निर्दयतेने आणि बेकायदेशीररीत्या वाहतूक करणारी एक बोलेरो पिकअप स्थानिक गुन्हे शाखेच्या (LCB) पथकाने पकडली आहे. या कारवाईत पोलिसांनी २ लाख १५ हजार रुपये किमतीच्या ५ जर्शी गायींची सुटका केली असून, वाहनासह एकूण १० लाख ६५ हजार रुपयांचा मुद्देमाल जप्त केला आहे. याप्रकरणी भूम तालुक्यातील एका तरुणाविरुद्ध गुन्हा दाखल करण्यात आला आहे.
दत्ता बाबा शिंदे (वय २६, रा. रामकुंड, ता. भूम, जि. धाराशिव) असे गुन्हा दाखल करण्यात आलेल्या संशयित चालकाचे नाव आहे. याप्रकरणी स्थानिक गुन्हे शाखेच्या पोलिसांकडून सरकारतर्फे फिर्याद देण्यात आली आहे.
वरुडा रोड ओव्हर ब्रिजवर सापळा
जिल्ह्यात गोवंशीय जनावरांची बेकायदेशीर वाहतूक होत असल्याची गुप्त माहिती स्थानिक गुन्हे शाखेच्या पथकाला मिळाली होती. या माहितीच्या आधारे एलसीबीच्या पथकाने बुधवारी (दि. २७ मे) मध्यरात्री पाऊण वाजेच्या सुमारास येडशी ते धाराशिव जाणाऱ्या रोडवरील वरुडा ओव्हर ब्रिज परिसरात सापळा रचला होता.
चारा-पाण्याविना जनावरांना डांबले
संशयास्पद रितीने येणारी महिंद्रा कंपनीची बोलेरो पिकअप (क्र. MH 325 AJ 0194) पोलिसांनी थांबवून त्याची झडती घेतली. यावेळी वाहनाच्या मागील भागात ५ जर्शी गायी अत्यंत दाटीवाटीने आणि निर्दयतेने बांधून ठेवल्याचे आढळून आले. वाहतुकीदरम्यान या जनावरांना खाण्यासाठी चारा किंवा पिण्याच्या पाण्याची कोणतीही व्यवस्था करण्यात आली नव्हती. ही जनावरे बेकायदेशीररित्या कत्तलखान्याकडे नेली जात असल्याचे स्पष्ट झाल्यानंतर पोलिसांनी सर्व गायींची सुटका केली.
वाहनासह मुद्देमाल जप्त
पोलिसांनी २ लाख १५ हजार रुपये किमतीच्या ५ गायी आणि वाहतुकीसाठी वापरलेली साडेआठ लाख रुपयांची बोलेरो पिकअप असा एकूण १० लाख ६५ हजार रुपयांचा मुद्देमाल जप्त केला आहे. आरोपी दत्ता शिंदे याच्याविरुद्ध ‘प्राण्यांना क्रूरतेने वागवण्यास प्रतिबंध अधिनियम’ कलम ११(१)(ब) सह ‘महाराष्ट्र प्राणी संरक्षण अधिनियम’ कलम ५(अ) अन्वये धाराशिव येथे गुन्हा दाखल करण्यात आला आहे. एलसीबीच्या या धडक कारवाईमुळे अवैध जनावरांचे छुपे नेटवर्क चालवणाऱ्यांचे धाबे दणाणले आहेत.
