धाराशिव : लाच घेतल्याप्रकरणी एक वर्षाची वेतनवाढ रोखण्याची शिक्षा भोगलेले धाराशिव शहर पोलीस ठाण्यातील पोलीस नाईक विष्णू बेळये पुन्हा एकदा वादाच्या भोवऱ्यात अडकले आहेत. जप्त केलेली दारू आणि वाहन प्रकरणात त्यांच्याविरुद्ध प्राथमिक अहवाल देऊनही वरिष्ठ अधिकारी त्यांना पाठीशी घालत असल्याचे चित्र आहे. त्यांच्या चौकशी अहवालात त्रुटी असल्याचे कारण पुढे करून तो अहवाल दडपण्याचा प्रयत्न होत असल्याची धक्कादायक माहिती माहितीच्या अधिकारातून (RTI) समोर आली आहे.
एका माहिती अधिकार कार्यकर्त्याने माहितीचा अधिकार अधिनियम २००५ अंतर्गत उपविभागीय पोलीस अधिकारी (SDPO) कार्यालयाकडे एका प्राथमिक चौकशी अहवालाची प्रत मागितली होती. गणेश प्रभाकर पाटील यांनी दिलेल्या निवेदनानुसार, धाराशिव शहर पोलीस ठाण्यातील पोलीस नाईक (बक्कल नंबर १११७) विष्णू बेळये यांच्यावर प्राथमिक चौकशी करण्यात आली होती. शहर पोलीस निरीक्षकांनी या चौकशीचा अहवाल (जावक क्रमांक ६५५/२०२६, दि. २६/०१/२०२६) उपविभागीय पोलीस अधिकारी यांच्याकडे सादर केला होता.
अहवाल ‘त्रुटीं’च्या नावाखाली प्रलंबित
या माहिती अधिकाराच्या अर्जावर उपविभागीय पोलीस अधिकारी कार्यालयाने २७ मे २०२६ रोजी दिलेल्या लेखी उत्तरानुसार, शहर पोलिसांनी जो मूळ चौकशी अहवाल दिला होता, त्यामध्ये त्रुटी काढण्यात आल्या. उपविभागीय कार्यालयाने ११ मार्च २०२६ रोजी (जा.क्र. ११५३/२०२६) एक पत्र काढून या अर्जातील त्रुटींची पूर्तता करून अहवाल पुन्हा सादर करण्याचे आदेश दिले. मात्र, अडीच महिन्यांचा कालावधी उलटूनही शहर पोलिसांनी सुधारित अहवाल अद्याप सादर केलेला नाही.
वादग्रस्त पार्श्वभूमी आणि वरिष्ठांचे ‘अभय’
मिळालेल्या माहितीनुसार, विष्णू बेळये यांची पार्श्वभूमी आधीपासूनच वादग्रस्त राहिली आहे. यापूर्वी लाच घेतल्याच्या प्रकरणात त्यांच्यावर कारवाई करत त्यांची एका वर्षाची वेतनवाढ रोखण्यात आली होती. तरीही त्यांच्या कार्यपद्धतीत सुधारणा झालेली नाही. आता दुसऱ्या एका प्रकरणात जप्त केलेली दारू, त्या प्रकरणी गाडी सोडून देणे आणि जप्त केलेला माल कमी दाखवणे, अशा गंभीर बाबी समोर आल्या आहेत. या प्रकरणी धाराशिव शहर पोलीस निरीक्षकांनी बेळये यांच्याविरुद्ध प्रथम अहवाल दिला होता. मात्र, असे गंभीर आरोप असतानाही वरिष्ठ अधिकारी त्यांना पाठीशी घालत असल्याचा आरोप होत आहे.
पोलीस ठाण्यातच कापला ‘बॉस’ लिहिलेला केक
पोलीस स्टेशनच्या आवारात स्वतःचा वाढदिवस साजरा करू नये, असा प्रशासनाचा स्पष्ट नियम आहे. मात्र, नियम धाब्यावर बसवून विष्णू बेळये यांचा वाढदिवस नुकताच पोलीस ठाण्यात साजरा करण्यात आला. विशेष म्हणजे, या वाढदिवसाच्या केकवर चक्क ‘बॉस’ (Boss) असे लिहिण्यात आले होते आणि तो केक थाटात कापण्यात आला.
एका बाजूला गंभीर प्रकरणांची चौकशी प्रलंबित ठेवली जाते आणि दुसऱ्या बाजूला असे प्रकार उघडपणे घडतात, यामुळे आश्चर्य व्यक्त केले जात आहे. विष्णू बेळये हे वरिष्ठ अधिकाऱ्यांना ‘मॅनेज’ करण्यात पटाईत असल्याची आणि त्यामुळेच त्यांच्यावर कारवाई होत नसल्याची जोरदार चर्चा सध्या पोलीस वर्तुळात आणि शहरात सुरू आहे.
