वाशी : शासकीय आदेशानुसार वाशी शिवारात रस्त्याचा मार्ग खुला करण्यासाठी गेलेले निवासी नायब तहसीलदार आणि शासकीय कर्मचाऱ्यांना मज्जाव करत, शासकीय कामात अडथळा आणल्याची गंभीर घटना समोर आली आहे. याप्रकरणी वाशी पोलीस ठाण्यात ८ जणांविरुद्ध बेकायदेशीर जमाव जमवून शासकीय आदेशाची अवहेलना केल्याप्रकरणी गुन्हा दाखल करण्यात आला आहे.
श्रीधर देविदास घुले, बिपीन रामलिंग घुले, अच्युत सोपान घुले, विलास हरिदास घुले, भारत सोपान घुले, हनुमंत देविदास घुले, रामलिंग हरिदास घुले आणि स्वप्नील हनुमंत घुले (सर्व रा. वाशी, ता. वाशी, जि. धाराशिव) अशी गुन्हा दाखल झालेल्या संशयित आरोपींची नावे आहेत. याप्रकरणी बीड येथील निवासी नायब तहसीलदार श्रीकिशन देवराव सांगळे (वय ५४, रा. सोमेश्वर नगर, बीड) यांनी वाशी पोलीस ठाण्यात फिर्याद दिली आहे.
पोलिसांकडून मिळालेल्या माहितीनुसार, ९ जून रोजी दुपारी साडेचार वाजेच्या सुमारास एनएच ५२ लगत असलेल्या वाशी शिवारातील जमीन सर्वे नंबर ६५३/ब, ६६७/ड, ६६७/फ, ६६७ येथे निवासी नायब तहसीलदार श्रीकिशन सांगळे हे आपल्या सहकाऱ्यांसह कायदेशीर हद्दीखुना करून रस्ता खुला करण्याचे शासकीय काम करत होते.
‘तुम्ही खुना करू नका, निघून जा!’
शासकीय पथक काम करत असतानाच, गावातील घुले गोटातील नमूद आठ जणांनी बेकायदेशीर जमाव जमवून तेथे धाव घेतली. त्यांनी शासकीय कामात थेट हस्तक्षेप करत रस्ता खुला करण्यास तीव्र मज्जाव केला. “तुम्ही येथे हद्दीच्या खुना करू नका, येथून निघून जा,” असे धमकावत त्यांनी शासकीय अधिकाऱ्यांना अडवले. प्रशासकीय आदेशाची सरळ-सरळ अवहेलना करत या जमावाने रस्ता खुला करण्याच्या कामात मोठा अडथळा निर्माण केला.
याप्रकरणी फिर्यादी निवासी नायब तहसीलदार श्रीकिशन सांगळे यांनी १० जून रोजी वाशी पोलीस ठाण्यात प्रथम खबरी अहवाल (FIR) दिला. त्यांच्या तक्रारीवरून पोलिसांनी सर्व आठ आरोपींविरुद्ध भारतीय न्याय संहिता (BNS) कलम १३२, १२६(२), २२३, १८९(२), १९० अन्वये गुन्हा नोंदवला आहे. वाशी पोलीस या प्रकरणाचा पुढील तपास करत आहेत.
