लोहारा : ‘माझा संसार का मोडलास? माझी बायको कुठे आहे? तू मेल्याशिवाय ती मला मिळणार नाही,’ असे म्हणत जावयाने सख्ख्या सासूच्या डोक्यात दगड घालून त्यांना जीवे मारण्याचा प्रयत्न केल्याची धक्कादायक घटना मुर्शदपूर (ता. लोहारा) येथे घडली आहे. या हल्ल्यात सासू गंभीर जखमी झाली असून, याप्रकरणी लोहारा पोलीस ठाण्यात जावयाविरुद्ध गुन्हा दाखल करण्यात आला आहे.
नितीन अशोक सुरवसे (रा. मुर्शदपूर, ता. लोहारा, जि. धाराशिव) असे गुन्हा दाखल झालेल्या संशयित जावयाचे नाव आहे. याप्रकरणी सुनिता मारुती खरोसे (वय ५०, रा. मुर्शदपूर) यांनी पोलिसांत फिर्याद दिली आहे.
नेमकी घटना काय?
पोलीस सूत्रांकडून मिळालेल्या माहितीनुसार, आरोपी नितीन सुरवसे आणि फिर्यादी सुनिता खरोसे हे नात्याने जावई-सासू आहेत. मंगळवारी (दि. ९ जून) दुपारी ३ वाजेच्या सुमारास आरोपी नितीन हा सुनिता यांच्या मुर्शदपूर येथील घरी गेला. तिथे गेल्यावर त्याने, ‘माझा संसार का मोडलास, माझी बायको कुठे आहे?’ अशी विचारणा करत सुनिता यांच्याशी वाद घालण्यास सुरुवात केली.
वाद विकोपाला गेल्यानंतर ‘तू मेल्याशिवाय माझी बायको मला मिळत नाही,’ असे म्हणत नितीनने सुनिता यांना जीवे मारण्याच्या उद्देशाने त्यांच्या डोक्यात दगडाने प्रहार केला. या गंभीर हल्ल्यात सुनिता खरोसे यांच्या डोक्याला गंभीर दुखापत झाली.
लोहारा पोलिसांत गुन्हा दाखल
घटनेनंतर जखमी सुनिता यांच्यावर रुग्णालयात उपचार सुरू करण्यात आले. बुधवारी (दि. १० जून) रुग्णालयातील वैद्यकीय जबाबावरून लोहारा पोलीस ठाण्यात आरोपी नितीन सुरवसे याच्याविरुद्ध भारतीय न्याय संहिता (BNS) कलम १०९(१), ११५(२), ३५१(२), ३५१(३) अन्वये गुन्हा नोंदवण्यात आला आहे. या घटनेचा पुढील तपास लोहारा पोलीस करत आहेत.
