धाराशिव: सरकारी रुग्णालयात बेड मिळत नाही म्हणून रुग्णांचे हाल होत असल्याच्या बातम्या आपण नेहमीच ऐकतो. पण धाराशिवमध्ये एक अजबच प्रकार समोर आला आहे. उपचार पूर्ण झाले, डॉक्टरांनी डिस्चार्जही दिला, तरीही एका महाशयांनी तब्बल अडीच महिने शासकीय रुग्णालयातील आपत्कालीन कक्षातील कॉट सोडण्यास साफ नकार दिला. अखेर या ‘अतिथी’ रुग्णाविरोधात धाराशिव शहर पोलीस ठाण्यात गुन्हा दाखल करण्यात आला आहे.
काय आहे नेमका प्रकार?
दत्ता वसंत ताकपिरे (रा. देशपांडे स्टँड, धाराशिव) असे गुन्हा दाखल झालेल्या अजब आरोपीचे नाव आहे. दत्ता यांना २८ मार्च २०२६ रोजी धाराशिव येथील शासकीय रुग्णालयातील आपत्कालीन कक्ष क्र. २ मध्ये उपचारासाठी दाखल करण्यात आले होते. सुमारे दोन महिने उपचार घेतल्यानंतर २१ मे २०२६ रोजी सकाळी ९:०० वाजता वैद्यकीय अधिकाऱ्यांनी त्यांचे उपचार पूर्ण झाल्याचे सांगून त्यांना रीतसर डिस्चार्ज (सुट्टी) दिला.
अडीच महिने ठिय्या! शासकीय कामात अडथळा
सामान्यतः डिस्चार्ज मिळाल्यावर रुग्ण आनंदाने घरी जातात. मात्र, दत्ता यांनी डिस्चार्ज मिळूनही आजतागायत (१७ जून २०२६ पर्यंत) आपत्कालीन कक्षातील ती कॉट सोडलीच नाही. शासकीय रुग्णालयात येणाऱ्या इतर गरजू आणि आपत्कालीन रुग्णांना बेड मिळणे गरजेचे असताना, या आरोपीने विनाकारण कॉट अडवून धरली. डॉक्टरांनी आणि प्रशासनाने वारंवार समजावून सांगूनही त्यांनी कॉट रिकामी केली नाही. त्यांच्या या हट्टापायी रुग्णालयाच्या शासकीय कामात मोठा अडथळा निर्माण झाला.
अखेर पोलिसात धाव
या प्रकाराला कंटाळून शासकीय वैद्यकीय महाविद्यालय धाराशिवचे अधीक्षक सचिन राजेंद्र सातदिवे (वय ३९ वर्षे) यांनी १७ जून २०२६ रोजी धाराशिव शहर पोलीस ठाण्यात तक्रार दिली. या प्रथम खबरीवरून आरोपी दत्ता ताकपिरे याच्याविरुद्ध भारतीय न्याय संहिता (BNS) कलम १३२, ३२९(३), २९६ आणि ३५१(२) अन्वये गुन्हा नोंदवण्यात आला आहे. या विचित्र प्रकरणाची सध्या संपूर्ण धाराशिव जिल्ह्यात जोरदार चर्चा सुरू आहे.
