मुरुम: वाशी तालुक्यापाठोपाठ आता उमरगा तालुक्यातील मुरुम पोलीस ठाण्याच्या हद्दीत बालविवाहाचा आणि अल्पवयीन मुलीच्या शोषणाचा आणखी एक संतापजनक प्रकार उघडकीस आला आहे. एका १७ वर्षे ७ महिने वयाच्या मुलीचा तिच्या आई-वडिलांनी आणि सासू-सासऱ्यांनी कायद्याचे उल्लंघन करून बालविवाह लावून दिला. त्यानंतर संबंधित पतीने तिच्यावर लैंगिक अत्याचार केला. याप्रकरणी मुरुम पोलिसांनी पीडितेच्या पतीसह तिचे आई-वडील आणि सासू-सासऱ्यांवर ‘पोक्सो’ (POCSO) आणि ‘बालविवाह प्रतिबंधक कायद्या’नुसार गुन्हा दाखल केला आहे.
अल्पवयीन असल्याचे माहीत असताना लावला विवाह
पोलिसांकडून मिळालेल्या प्राथमिक माहितीनुसार, पीडित मुलगी ही १७ वर्षे ७ महिन्यांची असून ती कायद्याने अल्पवयीन आहे, हे माहीत असतानाही तिच्या नातेवाईकांनी हा गुन्हा केला. २४ मे २०२५ ते २६ जून २०२६ या कालावधीत पीडितेच्या आई-वडिलांनी आणि मुलाकडच्या सासू-सासऱ्यांनी मिळून तिचा बालविवाह लावून दिला. लग्न झाल्यापासून ते २६ जून २०२६ पर्यंतच्या काळात, पीडिता अल्पवयीन आहे हे ठाऊक असतानाही तिच्या पतीने तिच्यावर वारंवार बळजबरीने लैंगिक अत्याचार केला.
पतीसह नातेवाईकांवर गंभीर कलमान्वये गुन्हे
या जाचाला कंटाळून अखेर पीडित मुलीने ३० जून २०२६ रोजी मुरुम पोलीस ठाण्यात धाव घेऊन तक्रार नोंदवली. तिच्या प्रथम खबरीवरून पोलिसांनी गुन्हा दाखल केला आहे.
-
आरोपी: पीडितेचा पती (तरुण), तिचे आई-वडील आणि सासू-सासरे.
-
दाखल कलमे: पोलिसांनी सर्व आरोपींविरुद्ध भारतीय न्याय संहिता (BNS) कलम ६४(२), ६४(२)(एम), ३(५) सह बालकांचे लैंगिक अत्याचारापासून संरक्षण अधिनियम २०१२ (पोक्सो) चे कलम ६ आणि बालविवाह प्रतिबंध अधिनियम २००६ चे कलम ९, १०, ११ अन्वये गुन्हा नोंदवला आहे. पुढील तपास मुरुम पोलीस करत आहेत.
