धाराशिव : दरोडा टाकण्याच्या तयारीत असताना पोलिसांवर दगडफेक करून घटनास्थळावरून पसार झालेल्या टोळीच्या मुसक्या आवळण्यात धाराशिव स्थानिक गुन्हे शाखेला (LCB) मोठे यश आले आहे. गोपनीय माहितीच्या आधारे केलेल्या या कारवाईत दोन प्रमुख आरोपींना ताब्यात घेण्यात आले असून, त्यांच्या सखोल चौकशीत या गुन्ह्यात सामील असलेले एकूण १० आरोपी निष्पन्न झाले आहेत.
दिनांक २ ऑगस्ट २०२६ रोजी काही आरोपी दरोडा टाकण्याच्या तयारीत असल्याची माहिती मिळताच पोलिसांचे पथक कारवाईसाठी गेले होते. मात्र, पोलिसांना पाहून आरोपींनी त्यांच्यावर दगडफेक केली आणि ते अंधाराचा फायदा घेत घटनास्थळावरून पसार झाले. पोलिसांनी घटनास्थळाची पाहणी केली असता, तेथे आरोपींनी दरोडा टाकण्यासाठी आणलेले साहित्य आढळून आले. या गंभीर घटनेप्रकरणी वाशी पोलीस ठाण्यात गुन्हा नोंद क्रमांक २८३/२०२६ नुसार भारतीय न्याय संहितेच्या (BNS) कलम ३१०(४), ३१० (५), १२१ आणि ३२४ अन्वये गुन्हा दाखल करण्यात आला होता.
घटनेनंतर आरोपींचा शोध घेण्यासाठी स्थानिक गुन्हे शाखेने तपासाची चक्रे गतिमान केली. मालमत्तेविषयक गुन्हे उघडकीस आणण्याच्या अनुषंगाने दिनांक ९ ऑगस्ट रोजी स्थानिक गुन्हे शाखेचे सहाय्यक पोलीस निरीक्षक (सपोनि) कासार आणि त्यांचे पथक पेट्रोलिंग करत होते. यादरम्यान मिळालेल्या गोपनीय माहितीच्या आधारे पोलिसांनी कळंब तालुक्यातील कन्हेरवाडी शिवारात सापळा रचला आणि रामा उर्फ बेल्या शंकर काळे (वय २३) व सरदार शंकर काळे (वय २८, दोघेही रा. कन्हेरवाडी, ता. कळंब) या दोन प्रमुख आरोपींना ताब्यात घेतले.
या दोन्ही आरोपींकडे कसून चौकशी केली असता, त्यांनी आपल्या इतर साथीदारांसोबत मिळून हा गुन्हा केल्याची कबुली दिली. या तपासात गुन्ह्यातील एकूण १० आरोपी निष्पन्न झाले आहेत. ताब्यात घेण्यात आलेल्या दोन्ही आरोपींची वैद्यकीय तपासणी करून, आवश्यक अहवालासह त्यांना पुढील कायदेशीर कारवाईसाठी वाशी पोलीस ठाण्यात हजर करण्यात आले आहे.
ही उल्लेखनीय कारवाई धाराशिवच्या पोलीस अधीक्षक श्रीमती रितू खोखर आणि अप्पर पोलीस अधीक्षक सचिन पांडकर यांच्या मार्गदर्शनाखाली पार पडली. स्थानिक गुन्हे शाखेचे पोलीस निरीक्षक विनोद इज्जपवार, सपोनि. सुदर्शन कासार, पोलीस हवालदार शौकत पठाण, प्रकाश औताडे, जावेद काझी, फरहान पठाण, तसेच चालक पोलीस हवालदार नागनाथ गुरव आणि रत्नदीप डोंगरे यांच्या पथकाने संयुक्तरीत्या ही कारवाई यशस्वी केली.
