भूम : भूम व वाशी पोलिसांनी संयुक्त कारवाई करत दोन पिकअप वाहनांमधून मोठ्या प्रमाणात प्रतिबंधित गुटखा व तंबाखूजन्य पदार्थ जप्त केले. या कारवाईत दोन वाहनांसह तब्बल 16 लाख 58 हजार 522 रुपयांचा मुद्देमाल जप्त करण्यात आला.
पोलीस अधीक्षक रितु खोखर, अपर पोलीस अधीक्षक सचिन पांडकर, उपविभागीय पोलीस अधिकारी अनिल चोरमले यांच्या मार्गदर्शनाखाली आणि परिविक्षाधीन पोलीस उपअधीक्षक अमोल मोहिते यांना मिळालेल्या गोपनीय माहितीच्या आधारे ही कारवाई करण्यात आली.
11 ऑगस्ट 2026 रोजी रात्री सुमारे 10 वाजता धाराशिव-बीड राष्ट्रीय महामार्गावरील दहिफळ शिवारातील विश्वजित ढाब्याच्या पाठीमागे दोन संशयित पिकअप वाहनांची तपासणी करण्यात आली. यामध्ये महिंद्रा बोलेरो पिकअप (MH-23-AU-5810) आणि अशोक लेलँड पिकअप (MH-14-EM-5173) या वाहनांचा समावेश होता.
तपासणीदरम्यान दोन्ही वाहनांमध्ये ‘गोवा १०००’ गुटखा, ‘केसरीयुक्त विमल पान मसाला’, ‘व्ही-१ सुगंधित तंबाखू’, ‘शॉट ९९९ सुगंधित तंबाखू’ आणि ‘डायरेक्टर स्पेशल पान मसाला’ यासह विविध प्रतिबंधित पदार्थ आढळून आले.
पोलिसांनी 6 लाख 58 हजार 523 रुपये किमतीचा गुटखा व तंबाखूजन्य पदार्थ तसेच अंदाजे 10 लाख रुपये किमतीची दोन पिकअप वाहने असा एकूण 16 लाख 58 हजार 522 रुपयांचा मुद्देमाल जप्त केला.
या प्रकरणी अन्न सुरक्षा अधिकारी रोहित दिनेश फंदी (वय 25) यांच्या फिर्यादीवरून वाशी पोलीस ठाण्यात गुन्हा क्रमांक 269/2026 दाखल करण्यात आला आहे. भारतीय न्याय संहितेच्या कलम 123, 223, 274 व 275 तसेच अन्न सुरक्षा व मानके अधिनियम, 2006 मधील संबंधित तरतुदींनुसार गुन्हा नोंदविण्यात आला आहे.
दोन्ही वाहनांमधून प्रतिबंधित गुटखा व तंबाखूजन्य पदार्थांची विक्रीच्या उद्देशाने वाहतूक केली जात असल्याचा प्राथमिक अंदाज असून, वाहनांचे अज्ञात चालक तसेच या अवैध वाहतुकीमागील व्यक्तींचा शोध सुरू आहे. ही कारवाई भूम व वाशी पोलीस ठाण्यांच्या पथकांनी संयुक्तपणे केली.
उमरग्यात किराणा दुकानातून प्रतिबंधित गुटखा जप्त; २,७०० रुपयांचा मुद्देमाल हस्तगत
उमरगा : उमरगा शहरात किराणा दुकानातून विक्रीसाठी जवळ बाळगलेला प्रतिबंधित गुटखा व तंबाखूजन्य पदार्थ पोलिसांनी जप्त केला. ही कारवाई १३ ऑगस्ट रोजी रात्री करण्यात आली.
पोलिसांनी दिलेल्या माहितीनुसार, बाजार समितीसमोर एकोंडी रोड, उमरगा येथे अब्दुल्ला नावाचे किराणा दुकान आहे. या दुकानात महमद रशीद कवठेकर (वय ४५, रा. बाजार समितीसमोर, एकोंडी रोड, उमरगा) याने महाराष्ट्र शासनाने प्रतिबंधित केलेला गुटखा व तंबाखूजन्य पदार्थ विक्रीसाठी जवळ बाळगल्याचे आढळून आले.
पोलिसांच्या कारवाईत विमल पान मसाला, व्ही-१ तंबाखू, प्रिमियम आरएमडी पान मसाला आदी पदार्थांचा समावेश असून, त्यांची एकूण किंमत २ हजार ७०० रुपये आहे. पोलिसांनी हा मुद्देमाल जप्त केला.
या प्रकरणी उमरगा पोलीस ठाण्यात भारतीय न्याय संहितेच्या कलम २२३, २७४, २७५ तसेच अन्न सुरक्षा व मानके अधिनियमाच्या कलम ५९ अन्वये गुन्हा दाखल करण्यात आला आहे. पुढील तपास उमरगा पोलीस करीत आहेत.
