धाराशिव : घर बंद करून कुटुंबासह मुंबई येथे गेलेल्या एका नागरिकाच्या राहत्या घराचे कुलूप तोडून अज्ञात चोरट्याने सोन्याचे आणि चांदीचे दागिने असा एकूण ७२ हजार रुपये किमतीचा ऐवज चोरून नेल्याची घटना समोर आली आहे. शहरातील संभाजीनगर भागातील वृंदावन कॉलनीत हा घरफोडीचा प्रकार घडला असून, याप्रकरणी आनंदनगर पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
मिळालेल्या माहितीनुसार, धाराशिव शहरातील राधिका हॉटेलच्या पाठीमागे असलेल्या संभाजीनगर येथील वृंदावन कॉलनीतील रहिवासी आनंद घोंडोपंत कस्तुरे (वय ५० वर्षे) हे घराला कुलूप लावून मुंबई येथे गेले होते. हीच संधी साधत १५ नोव्हेंबर रोजी पहाटे २:०० ते ४:०० वाजेच्या सुमारास अज्ञात चोरट्याने त्यांच्या घराचे कुलूप तोडून आत प्रवेश केला आणि घरातील सोन्याचे व चांदीचे दागिने असा एकूण ७२ हजार रुपये किमतीचा मुद्देमाल लंपास केला.
मुंबईहून परतल्यानंतर घरात चोरी झाल्याचे निदर्शनास येताच आनंद कस्तुरे यांनी १७ नोव्हेंबर रोजी आनंदनगर पोलीस ठाण्यात धाव घेऊन फिर्याद दिली. त्यांच्या तक्रारीवरून आनंदनगर पोलिसांनी अज्ञात चोरट्याविरुद्ध भारतीय न्याय संहिता (BNS) कलम ३३१(४) (रात्रीच्या वेळी घरफोडी करणे) आणि ३०५(अ) (राहत्या घरात चोरी करणे) अन्वये गुन्हा नोंदवला आहे. या प्रकरणाचा पुढील तपास आनंदनगर पोलीस करत आहेत.
धाराशिव : ताजमहल टॉकीज परिसरातून एक लाखांची टीव्हीएस दुचाकी लंपास
धाराशिव : शहरातील वर्दळीच्या समजल्या जाणाऱ्या ताजमहल टॉकीज परिसरातून अज्ञात चोरट्याने तब्बल एक लाख रुपये किमतीची टीव्हीएस कंपनीची दुचाकी चोरून नेल्याची घटना उघडकीस आली आहे. याप्रकरणी धाराशिव शहर पोलीस ठाण्यात अज्ञात चोरट्याविरुद्ध चोरीचा गुन्हा दाखल करण्यात आला आहे.
मिळालेल्या माहितीनुसार, बेगडा सुर्डी येथील मूळ रहिवासी व सध्या बँक कॉलनी, धाराशिव येथे वास्तव्यास असलेले नारायण बाबा कांबळे (वय ४३ वर्षे) हे १४ नोव्हेंबर रोजी सायंकाळी ६:०० ते रात्री १०:०० वाजेच्या सुमारास ताजमहल टॉकीज परिसरात आले होते. त्यांनी आपली काळ्या रंगाची टीव्हीएस कंपनीची मोटरसायकल (क्रमांक एमएच २५ बीएल ०६७५) तेथे उभी केली होती.
याच दरम्यान संधी साधत अज्ञात चोरट्याने अंदाजे १ लाख रुपये किमतीची ही दुचाकी चोरून नेली. दुचाकी चोरीला गेल्याचे लक्षात आल्यानंतर नारायण कांबळे यांनी १७ नोव्हेंबर रोजी धाराशिव शहर पोलीस ठाण्यात धाव घेऊन फिर्याद दिली.
त्यांच्या तक्रारीवरून धाराशिव शहर पोलिसांनी अज्ञात चोरट्याविरुद्ध भारतीय न्याय संहिता (BNS) कलम ३०३(२) (चोरी करणे) अन्वये गुन्हा नोंदवला आहे. परिसरातील सीसीटीव्ही फुटेजच्या आधारे पोलीस या चोरट्याचा शोध घेत आहेत.


