कळंब – सार्वजनिक रस्त्यालगत नागरिकांच्या जीवितास धोका निर्माण होईल अशा निष्काळजी पद्धतीने गॅस शेगडी पेटवून खाद्यपदार्थ विकणाऱ्या ४ वडापाव चालकांवर कळंब पोलिसांनी कारवाईचा बडगा उचलला आहे. याप्रकरणी कळंब पोलीस ठाण्यात चार वेगवेगळ्या वडापाव चालकांविरुद्ध स्वतंत्र गुन्हे दाखल करण्यात आले आहेत.
नेमकी कारवाई काय?
दिनांक १८ ऑगस्ट २०२६ रोजी सायंकाळी ५.५९ ते रात्री ८.१५ वाजेच्या सुमारास कळंब पोलीस ठाण्याच्या पथकाने विविध ठिकाणी तपासणी केली असता, खालील हातगाडी चालकांनी कोणतीही सुरक्षितता न बाळगता निष्काळजीपणे गॅस शेगडी पेटवून भारतीय न्याय संहितेच्या (BNS) नियमांचे उल्लंघन केल्याचे आढळून आले:
-
भरकादेवी वडापाव सेंटर (इटकूर रोड): ओमप्रकाश छगनलाल गोस्वामी (वय १९ वर्षे, मूळ रा. पंचमला, ता. जि. राजसमंद, राजस्थान, सध्या रा. इटकूर, ता. कळंब).
-
शिवराज वडापाव सेंटर (अहिल्याबाई होळकर चौक, कळंब): किरण विठ्ठल आळणे (वय २५ वर्षे, रा. ढोकी रोड, कळंब).
-
येडेश्वरी वडापाव सेंटर (डिकसळ, पेट्रोल पंपासमोर): आलीम सलिम शेख (वय ४२ वर्षे, रा. डिकसळ, ता. कळंब).
-
लक्की वडापाव सेंटर (डिकसळ, ढोकी रोड): किरण बबन उचले (वय ३६ वर्षे, रा. चोंदे गल्ली, कळंब).
४ स्वतंत्र गुन्हे दाखल
सार्वजनिक ठिकाणी अग्नी किंवा ज्वलनशील पदार्थाचा निष्काळजीपणे वापर करून मानवी जीवितास धोका पोहोचवल्याप्रकरणी कळंब पोलिसांनी सरकारतर्फे दिलेल्या फिर्यादीवरून वरील चौघांविरुद्ध कळंब पोलीस ठाण्यात स्वतंत्र ४ गुन्हे नोंदवले आहेत. या प्रकरणाचा पुढील तपास कळंब पोलीस करत आहेत.
