तामलवाडी – पत्नीसोबत असलेल्या अनैतिक संबंधांच्या संशयावरून एका २७ वर्षीय तरुणाचा निर्घृण खून केल्याची धक्कादायक घटना तुळजापूर तालुक्यातील माळुंब्रा गावाकडे जाणाऱ्या महामार्गाजवळ घडली आहे. याप्रकरणी तामलवाडी पोलीस ठाण्यात दोन सख्ख्या भावांवर खुनासह अनुसूचित जाती-जमाती अत्याचार प्रतिबंधक कायद्यान्वये (ॲट्रॉसिटी) गुन्हा दाखल करण्यात आला आहे.
नेमकी घटना काय?
मिळालेल्या माहितीनुसार, मयत अरविंद बाळू मस्के (वय २७ वर्षे, रा. तरटगाव, ता. उत्तर सोलापूर, जि. सोलापूर) याचे आरोपी विशाल वडणे (रा. माळुंब्रा, ता. तुळजापूर) याच्या पत्नीसोबत अनैतिक संबंध असल्याचा संशय होता.
याच कारणावरून १५ ऑगस्ट २०२६ रोजी सकाळी ९.०० वाजेच्या सुमारास माळुंब्रा गावाकडे जाणाऱ्या महामार्गाजवळ आरोपी विशाल वडणे आणि त्याचा भाऊ ओंकार वडणे यांनी संगनमत करून अरविंद मस्के याला गाठले. तेथे त्याला जबर मारहाण करत त्याचा जागीच जीव घेतला.
दोन आरोपींविरुद्ध खुनाचा व ॲट्रॉसिटीचा गुन्हा दाखल
याप्रकरणी मयताची आई रुक्मिणी बाळू मस्के (वय ४५ वर्षे, रा. तरटगाव, जि. सोलापूर) यांनी २२ ऑगस्ट २०२६ रोजी तामलवाडी पोलीस ठाण्यात फिर्याद दिली. त्यावरून पोलिसांनी आरोपी विशाल वडणे आणि ओंकार वडणे (दोघे रा. माळुंब्रा, ता. तुळजापूर) यांच्याविरुद्ध भारतीय न्याय संहिता (BNS) कलम १०३(१) (खून), ११५(२), ३(५) तसेच अनुसूचित जाती आणि अनुसूचित जमाती (अत्याचार प्रतिबंधक) कायदा कलम ३(२)(v), ३(२)(va) अन्वये गुन्हा नोंदवला आहे. या प्रकरणाचा पुढील तपास तामलवाडी पोलीस करत आहेत.
