नमस्कार वाचकहो! ‘धाराशिव लाइव्ह‘च्या या भन्नाट मालिकेत तुमचं स्वागत आहे. फेसबुक पिंट्या साहेबांच्या पोकळ विकासाचा डोलारा आता कसा पत्त्यांच्या बंगल्यासारखा कोसळत आहे आणि त्यांच्याच घरात कशी बंडाळी माजली आहे, याचा जिवंत पुरावा म्हणजे आजचा हा भाग!
चला तर मग, पाहूया साहेबांच्या डळमळीत झालेल्या खुर्चीचा आणि डॅमेज कंट्रोलसाठी सोडलेल्या नव्या ‘पुड्यांचा’ पंचनामा!
१. तुळजापूरच्या कारभाऱ्याचे स्टेटस: “आमचं ठरलंय!”
एकीकडे कळंबमधून काही जण ‘कमळाबाईच्या’ गोटात आल्याचा गाजावाजा फेसबुक पिंट्या साहेब करत आहेत, पण दुसरीकडे त्यांच्या स्वतःच्याच घरात मोठी आग लागली आहे! तुळजापूरमध्ये साहेबांचा सगळा कारभार बघणाऱ्या मुख्य कारभाऱ्याने (लीडरने) चक्क “आमचं ठरलंय” असे व्हॉट्सॲप (WhatsApp) स्टेटस ठेवल्यामुळे राजकीय वर्तुळात मोठी खळबळ उडाली आहे.
गेले सहा महिने या कारभाऱ्यांना साहेबांकडून स्थानिक कामे करायला छदामही (निधी) मिळालेला नाही. केवळ आश्वासनांवर किती दिवस जगायचे? यामुळे साहेब आणि त्यांच्याच तुळजापूरच्या लीडरमध्ये मोठी दरी निर्माण झाली असून, कार्यकर्ते प्रचंड त्रस्त आहेत.
२. सूर्यराजेंचा ५ कोटींचा दणका अन् साहेबांच्या कारभाऱ्यांची गोची!
साहेबांच्या कार्यकर्त्यांची सर्वात मोठी अडचण कुणी केली असेल, तर ती ‘सूर्यराजेंनी’! सूर्यराजेंनी ठाण्याच्या ‘दाढीवाल्या साहेबांकडून’ तुळजापूरसाठी थेट ५ कोटींचा निधी आणला. आता यातली सर्वात मोठी गोम म्हणजे, हा निधी नगरपालिकेकडून खर्च न करता थेट ‘सार्वजनिक बांधकाम विभागाकडून’ (PWD) खर्च केला जाणार आहे!
नगरपालिकेत बसून ‘टक्केवारीची’ स्वप्ने पाहणाऱ्या साहेबांच्या कारभाऱ्यांच्या तोंडाला यामुळे पाने पुसली गेली आहेत. जेंव्हापासून सूर्यराजे सत्तेत आलेत, तेंव्हापासून ठाण्याचे साहेब फक्त सूर्यराजेंच्याच फाईल्स पटापट पास करत आहेत, त्यामुळे फेसबुक पिंट्या साहेबांच्या सत्तेला मोठे हादरे बसत आहेत.
३. डॅमेज कंट्रोल: साहेबांचे १६ कोटी ३४ लाखांचे ‘हायटेक’ विश्रामगृह!
आपलेच कार्यकर्ते सोडून चाललेत आणि सूर्यराजे भारी पडत आहेत, हे पाहून फेसबुक पिंट्या साहेबांनी विकासाच्या दोन मोठ्या ‘पुड्या’ (घोषणा) हवेत सोडल्या आहेत. एक म्हणजे काल आपण पाहिलेले तुळजापूरचे ‘हवेतील विमानतळ’, आणि दुसरी पुडी म्हणजे ‘१६ कोटी ३४ लाखांचे हायटेक दुमजली विश्रामगृह’!
साहेबांच्या ‘दिव्य पत्रकारांनी’ लगेच रंगीत बातम्या छापल्या- “३,३६६ चौरस मीटरची भव्य इमारत, सेंट्रलाइज्ड एसी (AC), १२ आलिशान व्हीआयपी (VIP) सूट्स, आणि ४० जणांचा डायनिंग हॉल!” अरे साहेब! ज्या तुळजापूरच्या नगरपालिकेला साधे खड्डे बुजवायला तुम्ही ६ महिने निधी देऊ शकला नाही, तिथे तुम्ही १६ कोटींचे हे ‘हायटेक’ महाल उभारणार? जनतेला विकासाचे गाजर दाखवण्याची पण काही हद्द असते!
४. नेटकऱ्यांचा संताप: “आता मित्राची किडनी विकू, पण जेटच घेऊ!”
साहेबांच्या या विमानतळ आणि विश्रामगृहाच्या खोट्या घोषणांवर एका नेटकऱ्याने दिलेली भन्नाट कमेंट सध्या तुळजापुरात चांगलीच व्हायरल होत आहे. तो नेटकरी म्हणतो:
“तुळजापुरात एक हेलिपॅड आधीच होतं, जिथे २०१९ मध्ये पंतप्रधान आणि मोठ्या नेत्यांची हेलिकॉप्टर उतरली. मग २०२४ च्या निवडणुकीआधी PWD ने आणखी ६ कोटी रुपये खर्चून कागदोपत्री ‘दुसरं’ हेलिपॅड बांधलं! आता त्यात भर म्हणून थेट नवीन विमानतळ आणि १६ कोटींचे विश्रामगृह येतंय! धाराशिवचं विमानतळ अंबानी साहेबांनी चालवायला घेतल्याचं ऐकलं होतं… मी लोन काढून चारचाकी घ्यायच्या विचारात होतो, पण आता विचार बदलला… आता मित्रांची किडनी विकू, पण डायरेक्ट ‘जेट’च (Jet) घेऊ!”
तात्पर्य: फेसबुक पिंट्या साहेब, तुम्ही कितीही १६ कोटींच्या विश्रामगृहाच्या आणि विमानतळाच्या घोषणा करा, पण तुमची वेळ आता भरत आली आहे. तुमचेच कारभारी “आमचं ठरलंय” म्हणत आहेत आणि सूर्यराजे थेट जमिनीवरचा निधी आणत आहेत. आता तुमचे हे ‘हायटेक’ गाजर तुळजापूरची जनता खाणार नाही!
कारण विसरू नका… “यह पब्लिक है, सब जाणती है!”
