धाराशिव: पंचायत समिती ते समतानगर हा गेल्या ४० वर्षांपासून वापरात असलेला सार्वजनिक रस्ता बंद करण्याच्या जिल्हा परिषद अध्यक्षा सौ. अर्चना पाटील यांच्या प्रयत्नांना शिवसेना (उद्धव बाळासाहेब ठाकरे) पक्षाने मोठा सुरुंग लावला आहे. महालक्ष्मी सणाच्या मुहूर्तावर मध्यरात्री प्रशासकीय बळाचा वापर करत उभारण्यात आलेली ती वादग्रस्त विटांची भिंत अखेर ठाकरे सेनेच्या आक्रमक शिवसैनिकांनी हातोड्याचे घाव घालून जमीनदोस्त केली. दरम्यान, या कामासाठी जिल्हा परिषद बांधकाम उपविभागाने थेट २ लाख ५० हजार रुपयांचा कार्यारंभ आदेश (वर्क ऑर्डर) जारी केल्याचे अधिकृत पत्र समोर आल्यामुळे या प्रकरणाला आता राजकीय व प्रशासकीय वादाचे मोठे वळण लागले आहे.
४० वर्षांचा रस्ता रोखण्यासाठी ऐन सणात मध्यरात्री बांधकाम
धाराशिव ते येडशी मुख्य रस्त्याला लागून जिल्हा परिषद व पंचायत समितीच्या समोरील भाग आहे. येथून जिल्हाधिकारी कार्यालय, न्यायालय, पालिका, पोलीस मुख्यालय आणि मध्यवर्ती बस स्थानकाकडे दररोज हजारो नागरिक ये-जा करतात. स्थानिक नागरिकांच्या म्हणण्यानुसार, हा वर्दळीचा रस्ता बंद करण्यासाठी मागील काही महिन्यांपासून सातत्याने खटाटोप सुरू होता. यापूर्वीही तीन ते चार वेळा रस्ता अडवण्याचे प्रयत्न स्थानिकांनी हाणून पाडले होते.
मात्र, अध्यक्षांच्या कथित हट्टापायी ऐन महालक्ष्मी सणाच्या रात्री या जागेवर अचानक विटा आणून भिंत बांधण्याचे काम सुरू करण्यात आले. पंचायत समिती समोरील दोन प्रवेशद्वारांपैकी जिल्हा परिषदेकडील बाजूचे गेट विटांचे बांधकाम करून बंद करण्यात आले होते. सणाच्या काळात अंधारात चाललेली ही दडपशाही पाहून नागरिकांमध्ये तीव्र संताप उसळला होता.
ठाकरे सेनेची थेट धडक; हातोडे चालवून भिंत केली भुईसपाट
मध्यरात्री एका बाजूचे गेट बंद करून दुसरे गेट बंद करण्याची तयारी सुरू असतानाच युवासेना आणि ठाकरे सेनेचे पदाधिकारी, कार्यकर्ते घटनास्थळी दाखल झाले होते. त्या रात्री झालेला राडा आणि विरोध मोडून काढत प्रशासकीय वरदहस्ताने उभारण्यात आलेली ती भिंत अखेर ठाकरे सेनेने थेट पाडून टाकली.
शिवसैनिकांनी हातोडे आणि इतर साहित्यांसह घटनास्थळी धडक देत काही वेळातच संपूर्ण भिंत पाडून जनतेचा मार्ग पूर्ववत मोकळा केला. “जनतेचे हक्क हिरावून आणि सत्तेचा गैरवापर करून जर नागरिकांची अडवणूक केली जात असेल, तर अशी मुजोरी खपवून घेतली जाणार नाही,” असा थेट इशारा ठाकरे सेनेच्या पदाधिकाऱ्यांनी यावेळी दिला.
‘वर्क ऑर्डर’ समोर आल्याने नवा वाद; कागदपत्रांवरून संशय
एकिकडे नागरिकांकडून ही भिंत अनधिकृत असल्याचा आरोप होत असताना, दुसरीकडे जिल्हा परिषद बांधकाम उपविभागाचे एक अधिकृत कार्यारंभ आदेश पत्र समोर आले आहे.
-
कामाचे नाव: पंचायत समिती धाराशिव संरक्षण भिंत बांधकाम करणे व गेट बसविणे.
-
अंदाजित खर्च: २ लाख ५० हजार ६१७ रुपये.
-
कंत्राटदार: स्वप्नील नवनाथ नाईकवाडी (रा. बार्शी नाका, धाराशिव).
-
योजना: जि.प. सेस अंतर्गत सन २०२६-२७ च्या तरतुदीमधून हे काम मंजूर करण्यात आले आहे.
-
अटी: उपविभागीय अभियंता एच. एम. जगताप यांच्या स्वाक्षरीने हे आदेश निघाले असून, काम १०० दिवसांत पूर्ण करण्याचे बंधन घालण्यात आले होते.
सार्वजनिक वापराचा रस्ता असतानाही पंचायत समितीच्या संरक्षणाच्या नावाखाली भिंत उभारण्यासाठी एवढ्या घाईघाईत प्रशासकीय मंजुरी कशी मिळाली, असा सवाल आता उपस्थित केला जात आहे. वर्क ऑर्डरच्या तारखा आणि मध्यरात्री झालेल्या कामाची वेळ यावरूनही विरोधकांनी संशय व्यक्त केला आहे.
धाराशिवच्या वर्तुळात खळबळ
स्थानिक नागरिकांचा तीव्र विरोध असतानाही अडीच लाख रुपयांचा खर्च करून हा रस्ता बंद करण्याचा घाट कुणाच्या सांगण्यावरून घालण्यात आला होता, यावर आता चर्चा रंगली आहे. ठाकरे सेनेने थेट कारवाई करत भिंत पाडल्याने जिल्हा परिषदेच्या वर्तुळात एकच खळबळ उडाली असून, आता प्रशासन यावर काय भूमिका घेते आणि पुढील कायदेशीर पावले काय उचलली जातात, याकडे संपूर्ण जिल्ह्याचे लक्ष लागले आहे.
