नमस्कार वाचकहो! ‘धाराशिव लाइव्ह’च्या या खळबळजनक मालिकेत आज आपण फेसबुक पिंट्या साहेबांच्या ‘कारखानदारीतील’ महान कर्तृत्वाचा आणि जमिनी लाटण्याच्या अचाट कौशल्याचा पर्दाफाश करणार आहोत. जे स्वतःच्या हातातील कारखाने बुडवतात, ट्रस्ट बळकावतात आणि नंतर शेतकऱ्यांच्या पैशांवर डल्ला मारून कारखाने दुसऱ्यांना चालवायला देतात, अशा नेत्याचे खरे रूप आज आपण पाहणार आहोत!
१. ‘तेरणा’ची राखरांगोळी अन् ट्रस्टवर डल्ला!
धाराशिव तालुक्यातील शेतकऱ्यांची जीवनदायिनी असलेल्या ‘तेरणा साखर कारखान्याची’ फेसबुक पिंट्या साहेबांनी अक्षरशः वाट लावली. चालू कारखान्याचा ‘भंगार कारखाना’ करून ठेवला! इकडे कारखान्यावर तब्बल ४०० कोटींचे कर्ज करून ठेवले, आणि कारखान्याच्या माध्यमातून उभा राहिलेला ‘तेरणा ट्रस्ट’ मात्र साहेबांनी आपल्या खिशात घातला!
याच ट्रस्टच्या माध्यमातून साहेबांनी मेडिकल कॉलेज, इंजिनिअरिंग कॉलेज आणि महाविद्यालये सुरू केली अन् तिथे कोट्यवधी रुपयांची माया जमा केली.
२. सूर्यराजेंची कोंडी अन् धाराशिवची ती ‘एकाकी चिमणी’!
हा भंगार झालेला कारखाना जेव्हा सूर्यराजेंच्या ताब्यात गेला, तेव्हा साहेबांनी राजकारण करून अशी काही मुस्कटदाबी केली की सूर्यराजे हतबल झाले आणि कारखाना कायमचा बंद पडला (सध्या तो पुणेरी भैरवनाथ यांनी भाडेतत्त्वावर घेतला आहे).
यावरून लोकांची ओरड सुरू झाल्यावर साहेबांनी धाराशिव शहराजवळ ‘नवा कारखाना’ काढण्याची मोठी घोषणा केली. लोकांकडून शेअर्स गोळा केले, स्वस्तात शेतकऱ्यांच्या जमिनी खरेदी करून (लाटून) घेतल्या! आणि लोकांना खरे वाटावे म्हणून फक्त एक ‘चिमणी’ (Chimney) उभी केली. आज दहा वर्षे उलटून गेली, कारखाना अजूनही हवेतच आहे, पण लाटलेल्या त्या जमिनीचे भाव मात्र प्रचंड वाढले आहेत. साहेबांनी अशा तब्बल चार ठिकाणी जमिनी लाटून ठेवल्या आहेत!
३. ‘हावरगाव’चा खासगी कारखाना अन् बुडवलेली बिले!
स्वतःचे कर्तृत्व लपवण्यासाठी साहेबांचा लाडका चिरंजीव ‘मल्लू नेरुळकर’ याने कळंब तालुक्यातील हावरगाव येथे ‘डीडीएन शुगर अँड केमिकल्स’ (DDN SFA Ltd.) नावाचा एक खासगी कारखाना विकत घेतला. त्यावेळी “सर्वांपेक्षा जास्त भाव देणार” असा मोठा गाजावाजा करण्यात आला होता.
पण प्रत्यक्षात साहेबांच्या या कारखान्याने शेतकऱ्यांची आणि ऊस तोडणी ठेकेदारांची बिलेच बुडवली! २०२५-२६ च्या गळीत हंगामात वाहनधारक आणि मजुरांनी ऊस तोडणीचे काम केले, हंगाम संपून महिने उलटले, पण कारखान्याने अद्याप वाहतुकीची बिले आणि कमिशन दिलेले नाही. यामुळे वाहन चालकांवर बँकेचे हप्ते थकल्याने उपासमारीची वेळ आली आहे.
४. ठेकेदारांचे ‘ठिय्या आंदोलन’ अन् आत्मदहनाचा इशारा!
हक्काच्या घामाच्या पैशांसाठी आज, २९ सप्टेंबर रोजी दुपारी १२:३० वाजता संतप्त झालेल्या वाहतूकदार आणि चालकांनी कारखान्याच्या मुख्य प्रवेशद्वारासमोर जोरदार ‘ठिय्या आंदोलन’ सुरू केले आहे.
“ऊस पुरवठा अधिकाऱ्यांच्या सांगण्यावरून आम्ही ऊस आणून घातला, पण आता आमच्या हक्काच्या पैशांसाठी आम्हाला भीक मागायला लावली जात आहे,” असा थेट आरोप आंदोलकांनी केला आहे. २३ सप्टेंबरला इशारा देऊनही साहेबांच्या प्रशासनाने डोळेझाक केल्याने, आता आंदोलकांनी ‘सामूहिक आत्मदहनाचा’ थेट इशारा दिला आहे!
५. पळपुटे साहेब: आता कारखाना दिला दुसऱ्याला चालवायला!
या सगळ्या गोंधळात आणि आंदोलनात सर्वात मोठी आणि नवी बातमी ही आहे की, फेसबुक पिंट्या साहेबांनी हा ‘हावरगाव’चा कारखाना स्वतः चालवण्याऐवजी, गुपचूप कुणाला तरी दुसऱ्यालाच ‘चालवायला दिला’ आहे!
म्हणजे साहेबांची काम करण्याची पद्धत बघा: फुकटच्या घोषणा करायच्या, स्वस्तात जमिनी लाटायच्या, लोकांचे पैसे बुडवायचे आणि जबाबदारी आली की कारखाने दुसऱ्याच्या गळ्यात मारून मोकळे व्हायचे!
तात्पर्य: फेसबुक पिंट्या साहेब, तुमच्यात कारखाने चालवण्याचा कुठलाच ‘दम’ राहिलेला नाही, हे आता सिद्ध झाले आहे. तुम्ही फक्त ‘जमिनी लाटणारे’ आणि ‘फेसबुकवर घोषणा करणारे’ नेते उरला आहात. ठेकेदारांचा आणि शेतकऱ्यांचा हा संताप येत्या निवडणुकीत तुमची ‘चिमणी’ कायमची पाडल्याशिवाय राहणार नाही!
कारण विसरू नका… “यह पब्लिक है, सब जाणती है!”
