वाशी – परंडा येथून गोवंशाची कत्तल करून मांस व जिवंत जर्सी गायींची अवैध वाहतूक करणाऱ्या टोळीवर धाराशिव स्थानिक गुन्हे शाखेच्या (LCB) पथकाने धडक कारवाई केली आहे. वाशी पोलीस ठाण्याच्या हद्दीतील इंदापूर शिवारात महामार्गावर सापळा रचून दोन पिकअप आणि एका आयशर टेम्पोसह तब्बल २७ लाख ६२ हजार रुपयांचा मुद्देमाल जप्त करण्यात आला असून, आरोपींवर गुन्हा दाखल करण्यात आला आहे.
नेमकी कारवाई कशी झाली?
स्थानिक गुन्हे शाखेचे पथक ३० सप्टेंबर २०२६ रोजी अवैध धंद्यांवर पाळत ठेवून पेट्रोलिंग करत होते. त्यावेळी पथकाला गोपनीय बातमीदाराकडून पक्की माहिती मिळाली की, परंडा येथे गोवंशीय जनावरांची कत्तल करण्यात आली असून त्याचे मांस दोन पिकअप वाहनांमध्ये भरण्यात आले आहे. तसेच एका आयशर टेम्पोमध्ये कत्तलीसाठी जर्सी गायी भरून ही तिन्ही वाहने भूम, पारडी, येरमाळा मार्गे लातूरच्या दिशेने जाणार आहेत.
माहिती मिळताच पथकाने स्थानिक गुन्हे शाखेचे पोलीस निरीक्षक विनोद इज्जपवार यांना अवगत केले. त्यांच्या आदेशानुसार पथकाने तातडीने वाशी पोलीस ठाण्याच्या हद्दीतील राष्ट्रीय महामार्गालगत इंदापूर शिवारात नाकाबंदी करून सापळा लावला.
काही वेळातच माहितीतील संशयित दोन पिकअप व एक आयशर टेम्पो येताना दिसताच पोलिसांनी शिताफीने तिन्ही वाहने अडवली. वाहनांची कसून तपासणी केली असता पुढील धक्कादायक प्रकार समोर आला:
-
दोन पिकअप वाहने : यामध्ये गोवंशीय जनावरांची कत्तल करून भरलेले गोमांस मिळून आले.
-
आयशर टेम्पो : टेम्पोमध्ये १३ जर्सी गायी कोणत्याही चारा-पाण्याची सोय न करता, अत्यंत क्रूरतेने व दाटीवाटीने कत्तलीच्या उद्देशाने कोंबून नेल्या जात असल्याचे आढळले.
वाहनांसह साडे सत्तावीस लाखांचा मुद्देमाल जप्त
पोलिसांनी गोमांस, जिवंत गायी, दोन पिकअप आणि आयशर टेम्पो असा एकूण २७ लाख ६२ हजार रुपये किमतीचा मुद्देमाल जप्त केला. वाहनातील संशयित आरोपींना ताब्यात घेऊन सर्व मुद्देमालासह वाशी पोलीस ठाण्यात आणण्यात आले असून, संबंधितांवर प्राण्यांना क्रूरतेने वागवण्यास प्रतिबंध अधिनियम व इतर संबंधित कायद्यांन्वये गुन्हा नोंदवण्यात आला आहे.
स्थानिक गुन्हे शाखेची धडक कामगिरी
सदरची उल्लेखनीय कारवाई पोलीस अधीक्षक श्रीमती रितू खोखर व अपर पोलीस अधीक्षक सचिन पांडकर यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार, सपोनि सचिन खटके, पोलीस हवालदार विनोद जानराव, नितीन जाधवर, बबन जाधवर, चालक पोलीस हवालदार महेबुब अरब, सुभाष चौरे आणि प्रकाश बोईनवाड यांच्या पथकाने केली आहे.
