धाराशिव जिल्ह्यात गुटखाविरोधात पोलिसांची कारवाई; कळंब, ढोकी, मुरुममध्ये ५० हजारांहून अधिकचा मुद्देमाल जप्त

धाराशिव : महाराष्ट्र शासनाने प्रतिबंधित केलेला गुटखा व तंबाखूजन्य पदार्थांची विक्री करण्याच्या उद्देशाने जवळ बाळगणाऱ्या तीन जणांविरुद्ध धाराशिव जिल्ह्यातील कळंब, ढोकी आणि मुरुम पोलिसांनी कारवाई केली. या तीन कारवायांमध्ये एकूण ५० हजार ८३५ रुपयांचा गुटखा व तंबाखूजन्य मुद्देमाल जप्त करण्यात आला आहे. या प्रकरणी संबंधित पोलीस ठाण्यांमध्ये गुन्हे दाखल करण्यात आले आहेत.

कळंबमध्ये ४० हजार ७४० रुपयांचा गुटखा जप्त

कळंब पोलीस ठाण्याच्या हद्दीत ३१ ऑक्टोबर २०२६ रोजी सायंकाळी सुमारे ६.०६ वाजता सरकारी गोडाऊनजवळ पोलिसांनी कारवाई केली. यावेळी अनोळखी इसमांकडे महाराष्ट्रात शासनाने प्रतिबंधित केलेला रजनिगंधा पान मसाला, रत्ना तंबाखू, डायरेक्टर पान मसाला व तंबाखू असा एकूण ४० हजार ७४० रुपयांचा मुद्देमाल विक्रीसाठी जवळ बाळगलेला आढळून आला.

पोलिसांनी गुटखा व तंबाखूजन्य साहित्य जप्त केले असून संबंधितांविरुद्ध भारतीय न्याय संहिता कलम १२३, २२३, २७४, २७५ तसेच अन्न सुरक्षा व मानके कायद्यातील कलम २६(२)(iv), २७(३)(d), २७(३)(e), सहवाचन ३०(२)(अ), ५९ अन्वये कळंब पोलीस ठाण्यात गुन्हा नोंदविण्यात आला आहे.

ढोकीत ७ हजार ९९५ रुपयांचा मुद्देमाल जप्त

ढोकी पोलीस ठाण्याच्या हद्दीत पळसप पाटीजवळील हॉटेल सह्याद्री परिसरात ३१ ऑक्टोबर रोजी सायंकाळी ६.४५ वाजता कारवाई करण्यात आली. यामध्ये ऋषीकेश दिपक रणदिवे (वय २७, रा. मुरुड, ता. जि. लातूर) याच्याकडे महाराष्ट्रात प्रतिबंधित असलेला गुटखा व तंबाखूजन्य पदार्थ आढळून आले.

यामध्ये विमल केसरयुक्त पान मसाला, राजनिवास पान मसाला, केएन जाफरानी जर्दा, व्ही.आय. तंबाखू जर्दा आणि शॉट कंपनीची तंबाखू जर्दा असा एकूण ७ हजार ९९५ रुपयांचा मुद्देमाल पोलिसांनी जप्त केला.

या प्रकरणी भारतीय न्याय संहिता कलम २२३, २७४, २७५ तसेच अन्न सुरक्षा व मानके कायदा कलम ५९ अन्वये ढोकी पोलीस ठाण्यात गुन्हा दाखल करण्यात आला आहे.

मुरुममध्ये किराणा दुकानातून २ हजार १०० रुपयांचा गुटखा जप्त

मुरुम पोलीस ठाण्याच्या हद्दीतील कोथळी येथे किराणा दुकानात ३१ ऑक्टोबर रोजी सायंकाळी ७.३० वाजता पोलिसांनी कारवाई केली. यावेळी निळकंठ अर्जुन कांबळे (वय ३५, रा. कोथळी, ता. उमरगा, जि. धाराशिव) याच्याकडे विक्रीसाठी प्रतिबंधित गुटखा व तंबाखूजन्य पदार्थ आढळून आले.

पोलिसांनी विमल पान मसाला आणि सुगंधी तंबाखू असा एकूण २ हजार १०० रुपयांचा मुद्देमाल जप्त केला. याप्रकरणी भारतीय न्याय संहिता कलम २२३, २७४, २७५ अन्वये मुरुम पोलीस ठाण्यात गुन्हा दाखल करण्यात आला आहे.

दरम्यान, जिल्ह्यात प्रतिबंधित गुटखा व तंबाखूजन्य पदार्थांची विक्री आणि साठवणूक करणाऱ्यांविरुद्ध पोलिसांकडून कारवाई सुरू असून, या कारवाईमुळे गुटखा विक्रेत्यांचे धाबे दणाणले आहेत.