उमरगा : एका ६५ वर्षीय वृद्ध व्यक्तीला शिवीगाळ करत लाथाबुक्क्यांनी तसेच हातातील कड्याने मारहाण करून गंभीर जखमी केल्याची घटना उमरगा तालुक्यातील हिप्परगाराव येथे घडली आहे. याप्रकरणी उमरगा पोलीस ठाण्यात गावातीलच दोन संशयित आरोपींविरुद्ध गुन्हा दाखल करण्यात आला आहे.
मिळालेल्या माहितीनुसार, हिप्परगाराव (ता. उमरगा, जि. धाराशिव) येथील रहिवासी राम श्रीकांत पाटील (वय ६५ वर्षे) हे १३ नोव्हेंबर रोजी सायंकाळी ५:०० वाजेच्या सुमारास गावात असताना हा प्रकार घडला. गावातीलच रणजीत उर्फ ऋषीकेश बालाजी मुळे आणि बालाजी प्रभाकर मुळे (दोघे रा. हिप्परगाराव, ता. उमरगा) यांनी राम पाटील यांना अर्वाच्य भाषेत शिवीगाळ करण्यास सुरुवात केली.
यानंतर दोन्ही आरोपींनी संगनमत करून वृद्ध राम पाटील यांना लाथाबुक्क्यांनी तसेच हातातील लोखंडी/धातूच्या कड्याने जोरदार मारहाण केली. या मारहाणीत पाटील यांना गंभीर दुखापत झाली आहे.
उपचारानंतर राम पाटील यांनी १७ नोव्हेंबर रोजी उमरगा पोलीस ठाण्यात धाव घेऊन फिर्याद दिली. त्यांच्या तक्रारीवरून उमरगा पोलिसांनी रणजीत उर्फ ऋषीकेश बालाजी मुळे आणि बालाजी प्रभाकर मुळे या दोघांविरुद्ध भारतीय न्याय संहिता (BNS) कलम ११८(२), ११८(१) (धोकादायक साधनाने गंभीर दुखापत करणे), ११५(२) (स्वेच्छेने दुखापत करणे) आणि ३(५) (समान उद्देशाने एकत्रित गुन्हा करणे) अन्वये गुन्हा नोंदवला आहे. या प्रकरणाचा पुढील तपास उमरगा पोलीस करत आहेत.



