तुळजापूर : श्री तुळजाभवानी देवीच्या दर्शनासाठी आलेल्या अहिल्यानगर जिल्ह्यातील एका भाविक महिलेच्या उजव्या हातातील दोन तोळ्यांची सोन्याची पाटली गर्दीचा फायदा घेत कापून चोरून नेल्याची धक्कादायक घटना घडली आहे. याप्रकरणी तुळजापूर पोलीस ठाण्यात ठाणे जिल्ह्यातील अंबरनाथ येथील एका संशयित आरोपीसह त्याच्या इतर साथीदारांविरुद्ध चोरीचा गुन्हा दाखल करण्यात आला आहे.
मिळालेल्या माहितीनुसार, अहिल्यानगर जिल्ह्यातील शेवगाव तालुक्यातील मंगरुळ येथील रहिवासी स्वप्ना रमेश ढाकणे (वय ५७ वर्षे) या १७ नोव्हेंबर रोजी दुपारी २:०० वाजेच्या सुमारास श्री तुळजाभवानी मंदिरासमोरील महाद्वार परिसरात होत्या. यावेळी मंदिर परिसरात भाविकांची मोठी गर्दी होती.
याच गर्दीचा फायदा घेत संशयित आरोपी श्रीनाथ शंकू जाधव (वय ३९ वर्षे, रा. वांद्रापाडा, फातिमा चर्चच्या पाठीमागे, अंबरनाथ वेस्ट, जि. ठाणे) आणि त्याच्या इतर साथीदारांनी स्वप्ना ढाकणे यांच्या उजव्या हातातील दोन तोळे वजनाची सोन्याची पाटली (पोलीस तक्रारीत नमूद किंमत ७० हजार रुपये) कटरच्या सहाय्याने कापून अत्यंत शिताफीने चोरून नेली.
हातातील सोन्याची पाटली चोरीला गेल्याचे लक्षात येताच स्वप्ना ढाकणे यांनी त्याच दिवशी (१७ नोव्हेंबर) तुळजापूर पोलीस ठाण्यात धाव घेऊन फिर्याद दिली. त्यांच्या तक्रारीवरून तुळजापूर पोलिसांनी श्रीनाथ जाधव आणि त्याच्या साथीदारांविरुद्ध भारतीय न्याय संहिता (BNS) कलम ३०३(२) (चोरी करणे) आणि ३(५) (समान उद्देशाने एकत्रित गुन्हा करणे) अन्वये गुन्हा नोंदवला आहे. या प्रकरणाचा पुढील तपास तुळजापूर पोलीस करत आहेत.
वाशी : यशवंडी येथे मध्यरात्री घरफोडी
वाशी : राहत्या घरातील लोखंडी पेटीत ठेवलेले सोन्याचे दागिने आणि रोख रक्कम असा एकूण ८० हजार रुपये किमतीचा ऐवज अज्ञात चोरट्याने मध्यरात्रीच्या सुमारास चोरून नेल्याची घटना वाशी तालुक्यातील यशवंडी येथे घडली आहे. याप्रकरणी वाशी पोलीस ठाण्यात अज्ञात चोरट्याविरुद्ध चोरीचा गुन्हा दाखल करण्यात आला आहे.
मिळालेल्या माहितीनुसार, यशवंडी (ता. वाशी, जि. धाराशिव) येथील रहिवासी बाळासाहेब बाबू हाके (वय ६० वर्षे) यांच्या राहत्या घरात १६ नोव्हेंबर रोजी रात्री ११:३० ते १७ नोव्हेंबर रोजी पहाटे २:०० वाजेच्या सुमारास हा चोरीचा प्रकार घडला. या दरम्यान अज्ञात चोरट्याने घरात प्रवेश करून लोखंडी पेटीतील १५ ग्रॅम वजनाचे सोन्याचे दागिने आणि २० हजार रुपये रोख रक्कम असा एकूण ८० हजार रुपये किमतीचा मुद्देमाल लंपास केला.
सकाळी चोरीचा हा प्रकार उघडकीस आल्यानंतर बाळासाहेब हाके यांनी १७ नोव्हेंबर रोजी वाशी पोलीस ठाण्यात धाव घेऊन फिर्याद दिली. त्यांच्या तक्रारीवरून वाशी पोलिसांनी अज्ञात चोरट्याविरुद्ध भारतीय न्याय संहिता (BNS) कलम ३०३(२) (चोरी करणे) अन्वये गुन्हा नोंदवला आहे. या प्रकरणाचा पुढील तपास वाशी पोलीस करत आहेत.



