पुणे – धनकवडीतील वनराई कॉलनीत राहणाऱ्या निवृत्त लष्करी जवानाच्या रिव्हॉल्व्हरला धक्का लागल्याने गोळीबार झाला. यात १३ वर्षीय मुलगा जखमी झाला. घटनेची माहिती मिळताच पोलिसांनी घटनास्थळी धाव घेतली.
अभय नितीन शिर्के (१३) असे जखमी झालेल्या मुलाचे नाव आहे. याप्रकरणी त्याचे वडील निवृत्त जवान नितीन हनुमंत शिर्के (४०, रा. श्री गणेश अपार्टमेंट, वनराई कॉलनी, धनकवडी) यांच्याविरुद्ध सहकारनगर पोलिसांनी गुन्हा दाखल केला आहे.
नितीन शिर्के हे लष्करातून निवृत्त झाले आहेत. सध्या ते राज्याचे आरोग्यमंत्री आणि धाराशिवचे पालकमंत्री प्रा. तानाजी सावंत यांच्याकडे खासगी सुरक्षा अधिकारी म्हणून काम करतात. शिर्के यांच्याकडे शस्त्र परवाना आहे. त्यांनी रिव्हॉल्व्हर कपाटातील एका पिशवीत ठेवली होती. रिव्हॉल्व्हरमध्ये गोळ्या भरलेल्या होत्या. शिर्के यांचा मुलगा अभय हा सातवीत शिकतो.
मंगळवारी दुपारी तो घरात होता. दुपारी सव्वातीनच्या सुमारास अभयने कपाट उघडले असता रिव्हॉल्व्हर ठेवलेल्या पिशवीला धक्का लागला. पिशवी जमीनीवर पडली आणि रिव्हॉल्व्हरचा चापावर दाब पडला. त्यामुळे गोळीबार झाला. रिव्हॉल्व्हरमधून सुटलेली गोळी अभयच्या पायातून आरपार गेली. त्यावेळी अभयची आई आणि लहान भाऊ घरात होते.
शिर्के यांच्या बेजबाबदारपणामुळे ही दुर्घटना घडल्याचे उघडकीस आल्यानंतर त्यांच्याविरुद्ध गुन्हा दाखल करण्यात आला आहे. सहायक पोलीस निरीक्षक सागर पाटील तपास करत आहेत.
