धाराशिव जिल्ह्यात विधानसभा निवडणुकांचा माहोल जोरात आहे, जिल्ह्यातील चार विधानसभा मतदारसंघांपैकी परंडा आणि तुळजापूर मतदारसंघांमध्ये महाविकास आघाडीने महायुतीच्या उमेदवारांविरुद्ध दोन-दोन उमेदवार रिंगणात उतरवून लढाईत चुरस निर्माण केली आहे. या लढतीमुळे जिल्ह्यात राजकीय वातावरण तापले असून, मतदारांच्या प्रतिक्रिया कशा राहतात, याकडे सर्वांचे लक्ष लागले आहे.
परंडा मतदारसंघातील लढत
परंडा मतदारसंघात महायुतीकडून शिवसेना शिंदे गटाचे विद्यमान आमदार तानाजी सावंत मैदानात आहेत. त्यांच्यासमोर महाविकास आघाडीने दोन उमेदवार उतरवले आहेत – शिवसेना (उद्धव ठाकरे गट) चे रणजित पाटील आणि राष्ट्रवादी काँग्रेस शरद पवार गटाचे माजी आमदार राहुल मोटे. महाविकास आघाडीच्या रणनीतीनुसार, शिवसेनेच्या मतांमध्ये विभागणी घडवून राष्ट्रवादीचे राहुल मोटे यांना विजयी करून आणण्याचा प्रयत्न केला जात आहे. रणजित पाटील यांनी देखील जोरदार प्रचार सुरू केला आहे, त्यामुळे तानाजी सावंत यांच्यासाठी ही निवडणूक आव्हानात्मक ठरण्याची शक्यता आहे.
तानाजी सावंत हे परंडा मतदारसंघात मजबूत पकड असणारे नेते मानले जातात. त्यांचा हा विजय दुसऱ्यांदा होत असेल, तर त्यांना आणखी एक कार्यकाल मिळू शकतो. तथापि, रणजित पाटील आणि राहुल मोटे यांच्या उपस्थितीमुळे मतांची विभागणी होण्याची शक्यता आहे. त्यामुळे महाविकास आघाडीची ही योजना यशस्वी होते का, हे येत्या निवडणुकीत स्पष्ट होईल.
तुळजापूर मतदारसंघात चुरशीची लढत
तुळजापूर मतदारसंघात भाजपचे विद्यमान आमदार राणा जगजितसिंह पाटील यांनी पुन्हा एकदा उमेदवारी घेतली आहे. त्यांच्यासमोर महाविकास आघाडीने काँग्रेसकडून जिल्हाध्यक्ष ऍड. धीरज पाटील आणि राष्ट्रवादी शरद पवार गटाचे जीवनराव गोरे यांना मैदानात उतरवले आहे. तुळजापूर मतदारसंघात धाराशिव तालुक्यातील ७२ गावे आहेत, आणि येथे राणा जगजितसिंह पाटील यांना नेहमीच चांगली लीड मिळाली आहे. यंदा या लीडला कमी करण्यासाठी जीवनराव
गोरे यांना महाविकास आघाडीने उतरवले आहेत आणि यामुळे येथे लढतीला आणखीच रंग चढला आहे.
धीरज पाटील हे काँग्रेस पक्षाचे जिल्हाध्यक्ष असून, त्यांना तुळजापूर मतदारसंघातील काही भागात मजबूत समर्थन आहे. तसेच जीवनराव गोरे हे राष्ट्रवादीचे शरद पवार गटाचे नेते असून, त्यांची भूमिका देखील अत्यंत महत्त्वाची मानली जात आहे. महाविकास आघाडीची ही रणनीती राणा जगजितसिंह पाटील यांना अडचणीत आणते का, हे पाहणे औत्सुक्याचे ठरेल. दुसरीकडे, राणा पाटील यांच्या कार्यकाळात तालुक्यात केलेली कामे आणि त्यांच्या समर्थकांचा ठोस आधार त्यांच्या विजयासाठी महत्त्वपूर्ण ठरू शकतो.
संभाव्य परिणाम आणि निवडणूक चित्र
या निवडणुकांमध्ये महाविकास आघाडीच्या रणनीतीवर बऱ्याच तर्क वितर्क होत आहेत. दोन्ही मतदारसंघांत कोणत्या पक्षात विभागणी होणार ? मतदारांचा कल कोणाकडे राहणार, हे अद्याप स्पष्ट नाही. परंड्यात शिवसेनेतील दोन गटांमुळे मतांमध्ये विभागणी होण्याची शक्यता आहे, तर राष्ट्रवादीच्या एकजुटीतून राहुल मोटे यांना थेट फायदा होऊ शकतो. तर जीवनराव गोरे यांना ७२ गावातून मते मिळाल्यास आ. राणा पाटील यांना फटका बसू शकतो. त्यामुळे परंडा आणि तुळजापूर या दोन्ही मतदारसंघांत महाविकास आघाडीचा डाव यशस्वी होणार की त्यांच्या या खेळीचा परिणाम त्यांच्या विरुद्ध जाईल, हे येत्या काही दिवसांत दिसेल.
धाराशिव जिल्ह्यातील परंडा आणि तुळजापूर मतदारसंघांत राजकीय वातावरण तापलेले असून, प्रत्येक उमेदवार आपली ताकद लावून निवडणूक जिंकण्यासाठी आटोकाट प्रयत्न करत आहे. या निवडणुकीत कोणाची बाजू मजबूत राहील, कोणाचा डाव साध्य होईल, हे निवडणुकीच्या निकालानंतरच स्पष्ट होणार आहे.
