धाराशिव: राज्यातील अन्य जिल्ह्यांप्रमाणे धाराशिव जिल्ह्यातही काही तालुक्यांत संघटित गुन्हेगारीचे प्रकार घडत असल्याचे समोर येत आहे. गुन्हेगारी प्रवृत्तीचे लोक एकत्र येऊन सामान्य नागरिकांना त्रास देत असल्याच्या तक्रारी वाढत आहेत.
या प्रकारांना आळा घालण्यासाठी आमदार राणाजगजितसिंह पाटील यांनी कठोर भूमिका घेतली आहे. “अशा संघटित गुन्हेगारांना कायदेशीर अद्दल घडवू,” असा इशारा त्यांनी दिला आहे.
सध्या जिल्ह्यात पवनचक्की व सौर ऊर्जा प्रकल्प उभारण्याची कामे सुरू आहेत. या पार्श्वभूमीवर संघटित गुन्हेगारी क्षेत्रातील लोक सक्रिय झाल्याचे दिसून येत आहे. सामान्य नागरिकांना वेठीला धरून त्यांना त्रास देणे, दबाव टाकणे अशा स्वरूपाची कृत्ये समोर आली आहेत.
याबाबत जिल्हाधिकारी व जिल्हा पोलीस अधीक्षक यांना कायदेशीर कारवाई करण्याच्या सूचना देण्यात आल्या आहेत. जिल्ह्यातील शेतकरी आणि सामान्य नागरिकांच्या हिताचे रक्षण करण्यासाठी महायुती सरकार कटिबद्ध असल्याचे आमदार पाटील यांनी स्पष्ट केले.
“कोणाला जाणीवपूर्वक कोणी त्रास देत असेल तर त्यांनी रीतसर आवश्यक त्या पुराव्यासह पोलिसांकडे तक्रार द्यावी,” असे आवाहनही त्यांनी केले आहे.
बीड जिल्ह्यातील मस्साजोग प्रकरणी मुख्यमंत्री देवेंद्र फडणवीस यांनी विधानसभेत कठोर भूमिका घेतली आहे. संघटित गुन्हेगारी संपवण्यासाठी मोक्कासारखा कायदा वापरला जाणार असल्याचे त्यांनी स्पष्ट केले आहे. त्यामुळे धाराशिव जिल्ह्यातही मोक्का कायद्याचा वापर करण्यात येणार असल्याचे आमदार पाटील यांनी सांगितले.
पवन ऊर्जा प्रकल्पासाठी झालेल्या जमीन खरेदीत काही अनियमितता झाल्यास, जमीन मालक किंवा शेतकरी यांनी जिल्हाधिकाऱ्यांकडे तक्रार करावी, असे आवाहनही करण्यात आले आहे.
पवन ऊर्जा प्रकल्पासाठी झालेल्या जमीन खरेदीत कांही अनियमितता किंवा गैरव्यवहार झाले असतील,जमीन मालक किंवा शेतकरी यांच्या कांही तक्रारी असतील तर त्याचे निराकरण करण्यासाठी शासनाने जिल्हास्तरावर जिल्हाधिकारी यांच्या अध्यक्षतेखाली “पवन ऊर्जा प्रकल्प – जिल्हास्तरीय सनियंत्रण समिती” स्थापन केली असून त्यात जिल्हा पोलीस अधीक्षक देखील सदस्य आहेत त्यामुळे शेतकऱ्यांनी जर जमीन खरेदीच्या अनुषंगाने कांही तक्रारी असतील तर त्याबाबत दाद मागण्यासाठी जिल्हाधिकारी यांच्याकडे अर्ज करावा.
-आ. राणाजगजितसिंह पाटील
