तुळजापूरच्या ‘व्हाईट पावडर’मागे काळं राजकारण !

तुळजापूरसारख्या पवित्र भूमीत ड्रग्जचा विळखा इतका घट्ट बसलेला असेल, हे कधी कुणाला वाटलं होतं का? देवीची आराधना करणाऱ्या या नगरीत आता ‘व्हाईट पावडर’चा बाजार भरलाय आणि दुर्दैवाने, तोच बाजार पोसणारे नेतेमंडळी आणि त्यांचे हस्तक आहेत.

नेत्यांच्या छत्राखाली ‘गँग’ फोफावली

तुळजापुरात ड्रग्जचा व्यवसाय एका माजी नगराध्यक्षाच्या व्यसनातून सुरू झाला, आणि त्याच्याच ‘व्हाइट पावडर प्रेमामुळे’ एका टोळीने पूर्ण शहराला विळख्यात घेतलं. दिवसेंदिवस वाढत्या मागणीमुळे हा धंदा एवढा मोठा झाला की, आता यामध्ये राजकीय छत्रछायेत वाढलेली ‘गँग’ उभी राहिली आहे.

अलीकडेच अटकेत गेलेला विश्वनाथ उर्फ पिंटू मुळे हा भाजपचा पदाधिकारी, आणि त्याच्या आईच्या सभापतीपदाच्या काळातच हा कारभार जोरात सुरू होता. हा केवळ एक छोटा पाळीव मासा आहे, मोठे ‘शार्क’ अजूनही मोकाट आहेत!

पोलीस की ‘पोलीटिकल प्रोटेक्शन फोर्स’?

या प्रकरणातील अटकसत्र पाहिल्यास लक्षात येईल की, पोलीस फक्त ‘छोटे मासे’ पकडून फाइल क्लोज करण्याच्या तयारीत आहेत.

• पिंटू मुळे हा भाजपचा पदाधिकारी असल्याचे आता उघड झाले आहे, पण तो फक्त प्यादं आहे.
• शहरातील मोठे राजकीय लोक या धंद्यात गळ्यापर्यंत बुडाले आहेत.
• 1,500 हून अधिक तरुण ड्रग्जच्या आहारी गेलेत, पण कोण जबाबदारी घेणार?

पोलिसांनी एका पाठोपाठ एक सहा आरोपी अटक केले, पण अद्याप राजकीय वरदहस्त असलेले खरे गुन्हेगार बाहेरच आहेत.

हायप्रोफाईल ‘ड्रग माफिया’ कोण?

तुळजापुरात एवढ्या मोठ्या प्रमाणावर ड्रग्ज येते कसं?

• फक्त स्थानिक पातळीवर याचा व्यवसाय चालतोय असं नाही, तर हे एक मोठं नेटवर्क आहे.
• पोलिसांनी आतापर्यंत फक्त प्याद्यांना पकडलं, पण ‘किंगमेकर’ कोण आहे?
• ज्यांच्या ‘वजनामुळे’ आरोपींची अटक टळत होती, ते राजकीय नेते कोण?

मुख्यमंत्र्यांचा इशारा – पण फडणवीसांची यंत्रणा खरंच सक्रिय आहे का?

मुख्यमंत्री देवेंद्र फडणवीस यांनी ठणकावून सांगितलं –

“ड्रग्ज प्रकरणात पोलिसांचा सहभाग आढळल्यास त्याला थेट बडतर्फ करण्यात येईल.”

मग एवढ्या मोठ्या ड्रग्ज तस्करीत स्थानिक पोलीस आणि राजकीय मंडळींचा सहभाग कसा दिसला नाही?

• काही ‘गुप्तहेर’ अजूनही नेत्यांच्या ‘कमांड’वरच का काम करतायत?
• पोलिसांना ‘बडे मासे’ पकडण्याची हिंमत आहे का?

परंड्याचा ‘हाजी मस्तान’ अजूनही OUT OF COVERAGE!

तुळजापुरात एकामागून एक अटक होत असताना, परंड्यातील ‘हाजी मस्तान’ मात्र अजूनही OUT OF COVERAGE AREA आहे.

• परंड्यात ड्रग्जचा ‘सिंडिकेट’ एवढ्या जोरात चालतंय, पण स्थानिक पोलीस मूग गिळून बसलेत.
• एका मोठ्या राजकीय नेत्यामुळे हा हाजी मस्तान आजही पोलीसांच्या तावडीत सापडत नाही.
• पाच हजारांहून अधिक तरुणांना ड्रग्जच्या दलदलीत लोटणाऱ्यांना ‘राजकीय कवच’ कुठून मिळतंय?

तुळजापुरात ‘सफाई’ होईल, पण ती अपूर्णच राहील!

तुळजापूरमध्ये कारवाई वेगाने सुरू आहे, पण ती फक्त ‘छोट्या माशां’पुरतीच आहे.

• बड्या मास्यांवर कधी कारवाई होणार?
• ड्रग्जचा हा विळखा संपूर्णपणे तोडला जाणार का?
• राजकीय वरदहस्त असलेल्या नेत्यांची नावं समोर येणार का?

तुळजापूर आणि परंडा याठिकाणी एक संपूर्ण ‘ड्रग नेटवर्क’ चालवलं जातंय, पण तोडगा फक्त निवडणुकीपुरता निघतोय.
पोलीस आणि राजकीय यंत्रणांनी खऱ्या गुन्हेगारांना गजाआड करण्याची हिंमत दाखवली नाही, तर उद्या ‘तुळजापुरात ड्रग्ज’ ही बातमी दुर्मिळ राहणार नाही – ती वास्तव बनेल!