धाराशिव/उमरगा : नागपूर येथील घटनेची धग अद्याप शमली नसतानाच धाराशिव जिल्ह्यातील नारंगवाडी येथे औरंगजेब याचा फोटो व्हाट्सअ‍ॅप स्टेटसवर ठेवण्यात आल्याने तणाव निर्माण झाला आहे. या घटनेमुळे हिंदू संघटना आक्रमक झाल्या असून, उमरगा – लातूर महामार्गावर नारंगवाडी पाटी येथे रास्ता रोको आंदोलन करण्यात आले.
रास्ता रोकोमुळे महामार्गावरील वाहतूक तब्बल तीन तास ठप्प राहिली. आंदोलकांनी समाजकंटकाला तात्काळ अटक करण्याची मागणी केली. या परिस्थितीमुळे उमरगा शहरात तणाव वाढला असून, पोलिसांनी घटनास्थळी मोठा बंदोबस्त ठेवला आहे. उमरगा उपविभागीय पोलिस अधिकारी (DYSP) यांच्या नेतृत्वाखाली पोलिस बंदोबस्त तैनात करण्यात आला आहे.
हिंदू संघटनांचे कार्यकर्ते मोठ्या संख्येने उपस्थित होते आणि त्यांनी आरोपीच्या अटकेची मागणी केली. दरम्यान, पोलिसांनी संबंधित तरुणाला ताब्यात घेतले असून, परिस्थिती नियंत्रणात आणण्यासाठी पोलिसांनी सतर्कता बाळगली आहे.
रास्ता रोको आंदोलन तीन तासांनंतर मागे घेण्यात आले असले तरी तणाव कायम आहे. परिसरात शांतता राखण्यासाठी पोलिसांनी बंदोबस्त वाढवला असून, नागरिकांना अफवांवर विश्वास न ठेवण्याचे आवाहन करण्यात आले आहे.
