धाराशिव : शिवसेना (उद्धव बाळासाहेब ठाकरे) पक्षाचे युवासेना जिल्हा प्रमुख अक्षय ढोबळे व माजी नगरसेवक राणा बनसोडे यांनी शिवसेना ( उबाठा ) पक्षाला जय महाराष्ट्र करीत भाजपमध्ये प्रवेश केला आहे. भाजप महाराष्ट्र प्रदेशाध्यक्ष आणि महसूल मंत्री चंद्रशेखर बावनकुळे यांच्या प्रमुख उपस्थितीत त्यांनी भाजपमध्ये प्रवेश केला. यावेळी राज्याचे उच्च व तंत्रशिक्षण मंत्री चंद्रकांतदादा पाटील आणि आमदार राणा जगजितसिंह पाटील देखील उपस्थित होते.
भाजपमध्ये स्वागत आणि सन्मानाची हमी
भाजप परिवारातील प्रत्येक सदस्य आपल्यातील कार्यकर्ता जपण्याचा प्रयत्न करत असतो. भाजपा परिवाराशी जोडले गेल्यावर आपल्या सन्मानाला कोणतीही बाधा पोहोचणार नाही, असे आमदार राणा जगजितसिंह पाटील यांनी या वेळी सांगितले.
अक्षय ढोबळे यांचा युवासेनेच्या पदाचा राजीनामा
शिवसेनेच्या (उद्धव बाळासाहेब ठाकरे) स्थानिक गटबाजीमुळे त्रस्त होऊन अक्षय ढोबळे यांनी युवासेनेच्या जिल्हा प्रमुख पदाचा राजीनामा दिला आहे. त्यांनी आपला राजीनामा युवासेना प्रमुख आदित्य ठाकरे आणि वरुण सरदेसाई यांना पाठवला. या पत्रात स्थानिक पातळीवरील गटबाजीचा उल्लेख करत त्यांनी पक्ष सोडण्याचा निर्णय घेतल्याचे स्पष्ट केले.
