परंड्यात अंमली पदार्थ विरोधी टास्क फोर्सची मोठी कारवाई; नशेत वापरल्या जाणाऱ्या गोळ्यांसह ५७ हजारांचा मुद्देमाल जप्त

परंडा: अवैधरित्या नशेत वापरल्या जाणाऱ्या गोळ्यांची विक्री करणाऱ्या एका इसमाविरुद्ध अंमली पदार्थ विरोधी टास्क फोर्स, कृती छत्रपती संभाजीनगर विभाग (ANTF) यांनी धडक कारवाई केली आहे. या कारवाईत ५७,२०० रुपये किमतीचा अवैध अंमली पदार्थ (नशेच्या गोळ्या) आणि मोबाईल जप्त करण्यात आला असून आरोपीला अटक करण्यात आली आहे.

मिळालेल्या माहितीनुसार, १५ जून २०२६ रोजी अंमली पदार्थ विरोधी टास्क फोर्सला गुप्त बातमीदारामार्फत एक विश्वासू माहिती मिळाली होती. या माहितीच्या आधारे पथकाने दोन पंच आणि अन्न व औषध प्रशासन (FDA) निरीक्षकांसह परंडा शहरातील शासकीय रुग्णालयाच्या पाठीमागे सापळा रचला. बातमीची खात्री करून तेथे आलेल्या शाहीद सादीक शेख (वय ३९ वर्ष, रा. परंडा, जि. धाराशीव) याला सायंकाळी १७.०० वाजताच्या सुमारास ताब्यात घेण्यात आले.

नशेच्या गोळ्या आणि मुद्देमाल जप्त

पंचांसमक्ष आरोपीची अंगझडती घेतली असता, त्याच्याकडे खालील प्रतिबंधित औषधे आणि मुद्देमाल मिळून आला:

१) Niteor-10 (Nitrazepam घटक): १५ गोळ्या (किंमत ₹६,०००/-)

२) Nizascen-10 (Nitrazepam घटक): १० गोळ्या (किंमत ₹४,०००/-)

३) Anzilum 0.5 (Alprazolam घटक): ९३ गोळ्या (किंमत ₹३७,२००/-)

४) नशेच्या गोळ्यांच्या विक्रीसाठी वापरण्यात येणारा एक ‘विवो’ (Vivo) कंपनीचा मोबाईल.

असा एकूण ५७,२०० रुपये किमतीचा अवैध मुद्देमाल जप्त करण्यात आला आहे. आरोपी हा या गोळ्यांची विक्री करण्याच्या उद्देशाने त्या बाळगत असताना रंगेहात पकडला गेला.

गुन्हा दाखल

पोलीस निरीक्षक गीता बागवडे (ANTF) यांनी पंचांसमक्ष हा सर्व मुद्देमाल जप्त केला आणि आरोपीला परंडा पोलीस ठाण्यात हजर केले. सफौ/ वाहेद मुल्ला यांनी दिलेल्या तक्रारीवरून परंडा पोलीस ठाण्यात आरोपी शाहीद सादीक शेख याच्याविरुद्ध गुरन-३९०/२०२६, कलम 8(C), 22(A), NDPS Act सहकलम १८(क) औषधी व सौंदर्य प्रसाधने कायद्यानुसार गुन्हा दाखल करण्यात आला आहे.

कारवाई करणारे पथक

सदर यशस्वी कारवाई अंमली पदार्थ विरोधी टास्क फोर्सचे पोलीस महानिरीक्षक श्रीमती ज्योतीप्रिया सिंह मॅडम, पोलीस अधीक्षक अजीत टिके , डि.वाय.एस.पी.साईनाथ ठोंबरे यांच्या मार्गदर्शनाखाली करण्यात आली.

या कारवाईत पोलीस निरीक्षक श्रीमती गीता बागवडे, पोलीस उप-निरीक्षक प्रदीप ठाकूर, सपोउपनि वाहेद मुल्ला, हनुमान पुरके, हवालदार सुरेश राऊत, नागेश केंद्रे, निलेश सरपाळे, हरीशचंद्र मुंडे आणि ज्योती किर्तीकर यांनी महत्त्वाची भूमिका बजावली.