कळंब – तालुक्यात सोयाबीन पेरणीच्या कारणावरून झालेल्या वादात एका वृद्ध महिलेसह तिच्या मुलाला मारहाण करण्यात आल्याची घटना घडली आहे. या प्रकरणी कळंब पोलीस ठाण्यात सहा जणांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, रुक्मीनी बब्रुवान कसबे (वय 60) यांना 16 जून 2024 रोजी रात्री साडे नऊ वाजण्याच्या सुमारास मोहा शिवारातील त्यांच्या शेतात सोयाबीन पेरणीच्या कारणावरून सचिन सावंत, विमल सावंत, श्रीधर सावंत, कमल उर्फ कुसुम गायकवाड आणि गणेश गायकवाड या सहा जणांनी शिवीगाळ करून मारहाण केली. या घटनेत रुक्मीनी कसबे या जखमी झाल्या. तसेच, त्यांचा मुलगा गणेश यांनाही मारहाण करण्यात आली आणि जिवे मारण्याची धमकी देण्यात आली.
या प्रकरणी रुक्मीनी कसबे यांनी 14 सप्टेंबर 2024 रोजी कळंब पोलीस ठाण्यात तक्रार दाखल केली. तक्रारीवरून पोलिसांनी आरोपींविरुद्ध भारतीय दंड विधान संहितेच्या कलम 143, 147, 323, 504 आणि 506 अन्वये गुन्हा नोंदवला आहे. पोलिस या प्रकरणाचा पुढील तपास करत आहेत.
