पार्श्वभूमी: धाराशिव जिल्हा सध्या ड्रग्ज प्रकरणावरून चांगलाच गाजतोय. शिवसेना (ठाकरे गट) आणि भाजप यांच्यातील राजकीय संघर्ष या निमित्ताने पुन्हा एकदा पेटला असून, रोज नवनवीन आरोप-प्रत्यारोपांच्या फैरी झडत आहेत. जुन्या बातमीतील ठिणगीने आता चांगलाच वणवा पेटवला असून, त्याचेच हे विस्तारित नाट्य…
अंक पहिला: खासदारांचा ‘सणसणीत’ आरोप!
शिवसेना (ठाकरे गट) खासदार ओमराजे निंबाळकर यांनी आमदार कैलास पाटील यांना सोबत घेऊन पत्रकार परिषदेत भाजप आमदार राणा पाटील यांच्यावर जोरदार हल्ला चढवला. “तुळजापूर ड्रग्ज प्रकरणाची कल्पना आमदार राणा पाटलांना वर्षभरापूर्वीच होती. त्यांचा कार्यकर्ता विनोद गंगणे डिसेंबर २०२३ मध्ये ड्रग्जच्या व्यसनामुळे त्यांच्याच तेरणा हॉस्पिटलमध्ये दाखल होता. मग गुन्हा दाखल व्हायला १४ फेब्रुवारी २०२५ का उजाडावं लागलं? लोकसभा-विधानसभा निवडणुका शांततेत पार पाडण्यासाठी त्यांनी ही माहिती दाबून ड्रग्ज माफियांना पाठीशी घातलं,” असा थेट आरोप निंबाळकरांनी केला. “मी लोकसभेत, कैलास पाटलांनी विधानसभेत आवाज उठवला, पण ज्यांच्या मतदारसंघात हे घडलं ते राणा पाटील गप्प का? आता प्रकरण अंगाशी आल्यावर पोलिसांना टीप दिल्याचं सांगतायत, मग वर्षभर कोणाला वाचवत होता?” अशा प्रश्नांची सरबत्तीच त्यांनी केली.
अंक दुसरा: जिल्हाध्यक्षांचा ‘विकासाचा’ बचाव!
आमदार राणा पाटलांनी यावर मौन बाळगणं पसंत केलं, पण मैदानात उतरले भाजप जिल्हाध्यक्ष दत्ताभाऊ कुलकर्णी. त्यांनी निंबाळकर-पाटलांवर पलटवार करताना विकासाचा मुद्दा पुढे केला. “जिल्ह्यात टेक्निकल टेक्सटाईलचं काम सुरू झालं, हजारो हातांना रोजगार मिळणार, हे बघून विरोधकांना पोटशूळ उठलाय. जनतेचं लक्ष विचलित करण्यासाठी हे बिनबुडाचे आरोप सुरू आहेत. ‘नाचता येईना अंगण वाकडे’ अशी यांची गत आहे,” असा टोला त्यांनी लगावला.
कुलकर्णी पुढे म्हणाले, “स्वतः सत्तेत असताना यांनी जिल्ह्यासाठी काय केलं? मुख्यमंत्री, उद्योगमंत्री, पालकमंत्री त्यांचेच होते, तरी कौडगाव MIDC साठी साधी बैठकही घेतली नाही. आम्ही रेल्वेला निधी आणला, शेतकऱ्यांना थेट मदत, कृष्णा मराठवाडा प्रकल्प, तुळजापूर तीर्थक्षेत्र विकासासाठी १८६५ कोटी दिले. हे बघूनच यांना त्रास होतोय. ड्रग्जचं समूळ उच्चाटन करण्यासाठी आमचं सरकार कटिबद्ध आहे. राणा दादांच्या पुढाकारानेच कारवाई झाली, पोलीस योग्य काम करतायत, प्रकरण न्यायप्रविष्ट आहे. हे पोरकट धंदे थांबवून जनहिताची कामं करा, आप्तस्वकीयांच्या फायद्यासाठी पदाचा वापर करू नका.”
अंक तिसरा: शिवसेनेचा ‘प्रवक्तेपदावर’ सवाल!
कुलकर्णींच्या या भूमिकेवर शिवसेना ठाकरे पक्षाचे शहरप्रमुख सोमनाथ गुरव यांनी जोरदार प्रतिहल्ला चढवला. “भाजप जिल्हाध्यक्ष हे पक्षाचे प्रवक्ते आहेत की एका कुटुंबाचे? ड्रग्ज प्रकरणाची नि:पक्ष चौकशी व्हावी म्हणून खासदार-आमदार मुख्यमंत्र्यांना भेटणार म्हटल्यावर यांना मिरच्या झोंबल्या का?” असा सवाल गुरव यांनी केला.
ते पुढे म्हणाले, “कालच्या पत्रकार परिषदेत पक्षीय टीका नव्हती, ड्रग्जसारख्या सामाजिक विषयावर तपास योग्य व्हावा ही अपेक्षा होती. त्यात विकासाचं गोंडस नाव पुढे करून जिल्हाध्यक्ष कोणासाठी विषयांतर करत आहेत? एकाच कुटुंबावर बोलल्याचा तुम्हाला राग का येतो? याच कुटुंबाच्या कर्तबगारीमुळे जिल्हा आकांक्षित यादीत गेला. आता जो विकास तुम्ही सांगताय, तो त्याच कुटुंबाच्या नजरेतून दिसेल. ‘पार्टी विथ डिफरन्स’ म्हणणाऱ्यांना आरोपींची बाजू घेणं शोभतं का? पक्षप्रेम असेल तर गुन्हे दाखल झालेल्यांची पक्षातून हकालपट्टी करण्याचं धाडस दाखवाल का? की त्यासाठीही ‘त्या’ कुटुंबाची परवानगी घ्यावी लागेल? तुमच्या कागदावरच्या विकासाचं खरं रूप लवकरच जनतेसमोर आणू,” असा इशाराही गुरव यांनी दिला.
निष्कर्ष:
धाराशिवमधील ड्रग्ज प्रकरणावरून सुरू झालेला हा कलगीतुरा आता विकासाच्या मुद्द्याभोवती फिरत असला तरी, मूळ प्रश्न अजूनही अनुत्तरित आहेत. एकीकडे ड्रग्ज माफियांना पाठीशी घातल्याचा गंभीर आरोप, तर दुसरीकडे विकासाच्या गप्पा आणि विरोधकांना लक्ष्य करण्याची रणनीती. या राजकीय धुळवडीत सामान्य जनतेच्या मनात मात्र संभ्रम कायम आहे. येणारा काळच ठरवेल की, या प्रकरणाचं सत्य काय आणि जिल्ह्याच्या विकासाचं नेमकं चित्र काय!
