धाराशिव – धाराशिव मध्यवर्ती बसस्थानकावर प्रवाशांच्या दागिन्यांवर आणि पाकिटांवर डल्ला मारणाऱ्या भुरट्या चोरांचा सुळसुळाट वाढला आहे. बसमध्ये चढताना झालेल्या गर्दीचा गैरफायदा घेऊन एका ७५ वर्षीय वृद्धेच्या पर्समधून १२ ग्रॅम वजनाचे सोन्याचे दागिने अज्ञात चोरट्याने लंपास केले. याप्रकरणी आनंदनगर पोलीस ठाण्यात चोरीचा गुन्हा नोंदवला गेला असला, तरी बसस्थानकावरील वाढत्या चोऱ्या, पोलिसांचे अक्षम्य दुर्लक्ष आणि सुरक्षा यंत्रणेचा उडालेला बोजवारा यामुळे प्रवाशांमध्ये तीव्र संताप व्यक्त होत आहे.
बसमध्ये चढताना साधला डाव
कनगरा (ता. जि. धाराशिव) येथील रहिवासी हसीनाबी मुस्तफा शेख (वय ७५ वर्षे) या २९ सप्टेंबर २०२६ रोजी दुपारी १.१५ वाजेच्या सुमारास धाराशिव बसस्थानकावरून कळंबकडे जाणाऱ्या एसटी बसमध्ये चढत होत्या. बसमध्ये प्रवाशांची मोठी गर्दी होती.
याच गर्दीचा फायदा घेत अज्ञात चोरट्याने हसीनाबी यांच्या पर्समध्ये हात घालून त्यातील १२ ग्रॅम वजनाचे सोन्याचे दागिने अत्यंत शिताफीने चोरून नेले. गाडीत बसल्यानंतर पर्स तपासली असता दागिन्यांची चोरी झाल्याचे वृद्धेच्या निदर्शनास आले. त्यांनी तातडीने शोध घेतला, मात्र चोरटा पसार होण्यात यशस्वी झाला होता. अखेर ५ ऑक्टोबर २०२६ रोजी हसीनाबी शेख यांच्या प्रथम खबरेवरून आनंदनगर पोलिसांनी अज्ञात व्यक्तीविरुद्ध भारतीय न्याय संहिता (BNS) कलम ३०३(२) अन्वये गुन्हा दाखल केला आहे.
आनंदनगर पोलिसांचे दुर्लक्ष; बसस्थानकावर पोलीस चौकी असूनही हजेरी शून्य!
धाराशिव मध्यवर्ती बसस्थानकावर दररोज ग्रामीण व शहरी भागातील हजारो प्रवाशांची ये-जा असते. मात्र, गेल्या काही दिवसांपासून येथे पाकिटमारी, महिलांच्या गळ्यातील मंगळसूत्र आणि बॅगांमधून सोन्याचे दागिने लंपास होण्याच्या घटना नित्यनियमाने घडत आहेत.
या संपूर्ण प्रकाराकडे आनंदनगर पोलीस ठाण्याचे पूर्णतः दुर्लक्ष होत असल्याचा थेट आरोप प्रवाशांमधून केला जात आहे. सुरक्षेसाठी बसस्थानक परिसरात पोलीस कर्मचारी तैनात असणे आवश्यक असताना प्रत्यक्षात मात्र येथे पोलीस हजरच नसतात. पोलिसांच्या या निष्काळजीपणामुळे चोऱ्या करणाऱ्या टोळ्यांचे फावले असून, प्रवाशांना, विशेषतः वृद्ध व महिलांना, असुरक्षित वातावरणात प्रवास करावा लागत आहे.
लाखो रुपयांचे सीसीटीव्ही कॅमेरे वर्षभरातच धूळखात!
बसस्थानकावरील चोऱ्या रोखण्यासाठी आणि गुन्हेगारांवर नजर ठेवण्यासाठी एसटी महामंडळाने लाखो रुपये खर्च करून अत्याधुनिक सीसीटीव्ही यंत्रणा बसवली होती. मात्र, देखभालीअभावी बसवलेले हे सीसीटीव्ही कॅमेरे केवळ वर्षभराच्या आतच बंद पडले आहेत. अनेक कॅमेरे नादुरुस्त असल्याने गुन्हेगार चोऱ्या करून सहज पसार होतात आणि पोलिसांना तपास करताना सीसीटीव्ही फुटेजचा कोणताही ठोस आधार मिळत नाही. लाखो रुपयांचा खर्च करूनही प्रवाशांची सुरक्षितता मात्र वाऱ्यावर सोडण्यात आल्याने प्रवासी वर्गातून तीव्र संताप व्यक्त होत आहे.
