धाराशिव : जिल्ह्यातील वाशी, येरमाळा, तुळजापूर आणि ढोकी पोलीस ठाण्यांच्या हद्दीत चोरीच्या चार वेगवेगळ्या घटना समोर आल्या आहेत. या घटनांमध्ये विद्युत तार, ट्रान्सफॉर्मरमधील साहित्य तसेच दुचाकी असा एकूण लाखो रुपयांचा मुद्देमाल चोरीला गेला आहे. याप्रकरणी संबंधित पोलीस ठाण्यांमध्ये गुन्हे दाखल करण्यात आले आहेत.
वाशी पोलीस ठाणे : गोलेगाव शिवारात सुरू असलेल्या पीएसएस टू केटी-03 पॉईंटवरील ए-59 ईको पॅथ्र कंडक्टर ॲल्युमिनियमची सुमारे 1,500 मीटर व 3,000 मीटर अशी एकूण 4,000 मीटर विद्युत तार अज्ञात चोरट्यांनी लंपास केली. ही घटना 2 ऑक्टोबर रोजी पहाटे 3 ते सकाळी 8.30 वाजण्याच्या दरम्यान घडली. चोरीस गेलेल्या मालाची किंमत सुमारे 4 लाख रुपये आहे. राहुल मोहन पिसाळ यांच्या फिर्यादीवरून 4 ऑक्टोबर रोजी गुन्हा दाखल करण्यात आला.
येरमाळा पोलीस ठाणे : दुधळवाडी येथील शेतकरी संतोष केशव लाटे यांच्या गट क्रमांक 307 मधील ट्रान्सफॉर्मर फोडून चोरट्यांनी त्यातील वायडिंग कॉईल व सुमारे 220 लिटर ऑईल चोरी केले. वायडिंग कॉईलची किंमत सुमारे 40 हजार रुपये, तर ट्रान्सफॉर्मरची तोडफोड केल्याने सुमारे 67 हजार 600 रुपयांचे नुकसान झाले आहे. अजय नंदकिशोर कवडे यांच्या फिर्यादीवरून गुन्हा दाखल करण्यात आला आहे.
तुळजापूर पोलीस ठाणे : तुळजापूर शहरातील आठवडी बाजार रोडवरील राज पॅलेसजवळून विश्वजीत बसप्पा कदम यांची काळ्या रंगाची हिरो स्प्लेंडर प्लस मोटरसायकल (क्रमांक एमएच 25 एव्हाय 4042) अज्ञात व्यक्तीने चोरून नेली. 16 सप्टेंबर रोजी सायंकाळी 4.30 ते 7 वाजण्याच्या दरम्यान ही घटना घडली. दुचाकीची किंमत सुमारे 40 हजार रुपये असून, याप्रकरणी 4 ऑक्टोबर रोजी गुन्हा दाखल करण्यात आला.
ढोकी पोलीस ठाणे : बावी-ढोकी शिवारातील गट क्रमांक 85 मधील शासकीय जागेवर असलेल्या इन्फिसोल एनर्जी लिमिटेडच्या साईटवरून अज्ञात चोरट्यांनी सुमारे 2,900 मीटर ॲल्युमिनियम वायर चोरून नेली. 26 सप्टेंबर रोजी पहाटे 1 ते 5 वाजण्याच्या दरम्यान ही चोरी झाली. चोरीस गेलेल्या वायरची किंमत सुमारे 75 हजार रुपये असल्याचे फिर्यादीत नमूद आहे. साईट इंजिनिअर प्रशांत लक्ष्मण सोनकांबळे यांच्या फिर्यादीवरून गुन्हा नोंदवण्यात आला आहे.
चारही प्रकरणांमध्ये भा.न्या.सं. कलम 303(2) तसेच संबंधित प्रकरणात कलम 324(4) अन्वये गुन्हे दाखल करण्यात आले असून, अज्ञात चोरट्यांचा शोध सुरू आहे.
